Aura Casino cera pero a paga trahadonan bonus

PALM BEACH – Despues cu e trahadonan di e casino, no a ricibi nan pago di bonus, awe tardi nan a haya otro sorpresa. Uno cu sigur, no ta laga nan cera nan aña di un bon forma. E casino, pa cual nan ta traha, esta Aura Casino situa den Occidental Hotel, a cera su porta awe, cu ta nifica cu 44 trahado por ta sin trabou. Presidente di Sindicato FTA, Hubert Dirksz, a confirma na NoticiaCla.com awe nochi, cu e abogado di e casino, a confirm'e, cu e casino a cera su porta entrante awe. Esey el a tende durante e reunion, cu a termina diamars atardi, cu tanto gerente di e hotel como esun di casino. Diaranson merdia, lo tin un reunion cu mediado di gerencia y gerencia di hotel y casino, pa wak ki posibel otro solucion por tin pa e casino. Loke cu segun Dirksz, e gerente di hotel a bisa e lider sindical, ta cu loke ta sigur ta, cu nan lo no habri e casino aki mas. Un problema ta placa, cu e casino lo no tin mas. 

SIGURA PLACA PA E TRAHADONAN.

E proximo paso, segun Dirksz, ta pa e trahadonan haya mas hopi placa for di e casino, prome cu nan keda sin trabou. Dirksz a sigura, cu mientras cu porta di e casino ta cera, e trahadonan ainda ‘tin trabou’, den sentido, cu nan no a wordo retira ‘ainda’. Lo purba haci tur cos, pa acomoda e trahadonan, pa nan no keda sin trabou net prome cu fin di aña. Dirksz ademas a confirma, cu diamars anochi mes, e trahadonan lo haya nan bonus paga. Loke ta salario, ta keda pendiente. Den curso di diaranson lo por tin mas informacion.