ATIA: ta urgi gobierno pa extende e "deadline" pa entrega e declaracion di winstbelasting 2014

Posted on 12/15/2015, 1:06 PM AST | Updated on 12/15/2015, 8:59 PM AST

  ORANJESTAD - ATIA representando comercio, ta sostene e Asociacion di Fiscalistanan na Aruba (AVvB) y ta urgi gobierno pa extende e “deadline” di 30 di december 2015, pa entrega e declaracion di winstbelasting 2014. ATIA semper a expresa, di ta dispuesto pa asisti activamente, cu e introduccion di e ley nobo. Pero ATIA no tabata envolvi den e introduccion di e “Voldoening op Aangifte Winstbelasting (VAS)".

CARTA PA MINISTER

Dia 9 di november, ATIA a manda un carta pa Minister di Finansas, expresando su preocupacionnan tocante e ley di VAS y tambe a duna algun sugerencia, pero nunca a ricibi un reaccion, di parti di Minister di Finansas. Riba 16 di november ATIA, a reuni cu Parlamento di Aruba y a expresa un biaha mas, su preocupacionnan y tambe sugerencianan. Lamentablemente, esaki a sosode, na ultimo momento y no a resulta den e cambionan, cu tabata premira den e concepto final di e ley, cu a wordo aproba pa Parlamento, riba 18 di november 2015.

DEADLINE INACEPTABEL

ATIA ta di opinion, cu e “deadline” di 30 di december, ta inaceptabel mirando, cu ta introduci cambionan, den vispera di fin di aña, cu ta bolbe afecta e comerciantenan. Mester duna comercio tempo, pa adapta, na e cambionan, den e sistema di VAS. E periodo entre introduccion y “deadline”, ta sumamente cortico y ta crea un presion innecesario riba comerciantenan, pero tambe companianan di accountant y di administracion, cu ta custumbra, cu un periodo di mas o menos 18 luna, pa entrega e declaracion di winstbelasting. Ademas di esaki, algun compania, ainda no a ricibi nan aangiftebiljet di winstbelasting 2014, cu ta hasi'e casi imposibel, pa entrega esaki na tempo. ATIA ta spera, cu Minister di Finansas, tene esaki den consideracion y concede e posibilidadnan, pa extende e “deadline”, pa entrega e declaracion di winstbelasting 2014. ATIA ta keda dispuesto, pa sinta na mesa y discuti opcionnan, pa alivia e consecuencianan practico, di e introduccion di e sistema di VAS.