Trahadonan Aura Casino rabia pasobra no a haya bonus

PALM BEACH – Awe mainta, trahadornan di Aura Casino na Occidental hotel, ta rabia cu nan doño di trabou, pa motibo di bonus. Presidente di sindicato FTA, Hubert Dirksz, a confirma na NoticiaCla.com awe mainta, cu e trahadonan a pon’e na altura di e situacion. Aparentemente, e trahadonan mester a haya nan bonus paga dialuna 14 di december, pero esey lo no a sosode. “Compania no kier paga segun acuerdo den CAO,” Dirksz a bisa. Tambe segun e lider sindical, aparentemente e compania ta den problema financiero y lo por cera porta di un ora pa otro. E trahadornan ta reclama pago di bonus, cu segun nan por wordo paga awor. “E trahadornan lo no traha, si no ricibi pago di bonus,” Dirksz a sigui bisa.

HOPI COS DUDOSO

Manera por mira, tin hopi ‘aparentemente’, cu mester haya claridad den e proximo oranan. Mientrastanto segun e lider sindical, a manda e vice presidente di e sindicato, pa e casino, pa pone su mes na altura di e situacion actual. “Nan ta den casino,” Dirksz a bisa di e trahadonan, aunke e mes ta na sede di e sindicato. “ E trahadornan ta bisa cu e suma di placa cu tin pa operacion, ta alcanza pa paga nan, nan bonus. Mientrastanto, mediador di gobierno ta tratando pa haya e partidonan na mesa pa wak e situacion.” Y finalmente, Dirksz a bisa cu e compania lo a kita badge di tur trahador. Keda pendiente pa mas informacion durante curso di dia riba www.noticiacla.com