OM: No tin motibo pa sospecha ‘foul play’ cu morto di Mia

ORANJESTAD – E curpa di Mia Benscosme Ortiz, a wordo duna liber, pa fiscal ayera nochi, despues cu patologo a haci autopsia riba dje. “No tin ningun motibo pa sospecha, cu un persona a comete un hecho castigabel, cu a hiba na morto di e muher hoben aki,” vocero di Ministerio Publico, Ann Angela a bisa NoticiaCla.com awe mainta. Esey ta nifica cu e trabou di Ministerio Publico, tambe a caba eynan. Ministerio Publico ta na altura, cu e famia tin otro opinion, y nan ta respeta esey.

PROCEDURA NORMAL

“Nos ta sigui e procedura normal. Ta tuma beslag, patologo ta haci autopsia, ta duna curpa liber y ta haya e resultado documenta,” Angela a bisa. Ora cu e caso a tuma lugar diadomingo, mesora fiscal a tuma e curpa den beslag, pa despues ayera mainta 11’or e haci autopsia. Ayera nochi, e curpa a wordo duna liber na e famianan, pa nan por cuminsa cu e proceso di entiero.

CARTA HABRI DI FAMIA

Tabata dialuna anochi, cu pa medio di un carta habri, famianan di Mia Benscosme Ortiz, kier a sigura, cu e no a comete suicidio, pero mas bien ta victima di un caso di homicidio. E carta cu e titulo, ‘Mia no a comete suicidio’, a keda distribui pa prensa dialuna anochi, den un intento pa mustra, cu e famia no ta kere e noticia, cu nan yiu a comete suicidio, manera inicialmente a keda raporta. E carta ta firma pa e tata, Jorge Benscosme, mama Delia Josefina Ortiz y e ruman muhe Ella.

CONTENIDO DI E CARTA

Segun e carta, nan ta splica cu nan ta sigur, cu e caso no ta un suicidio y cu nan ‘lo busca e pruebanan necesario cu lo demonstra cu nos Mia stima no a comete suicidio.’ Nan ta sigui bisa, cu nan tin confiansa den e sistema hudicial y policial di Aruba. ‘Por lo tanto, nos ta spera, cu conhuntamente cu e medionan legal y forence, lo wordo aporta e pruebanan necesario, caminda lo por demostra, cu nos Mia stima, a bira victima di un homicidio y no di un supuesto suicidio. E famia ta sigui bisa, cu nan ta spera, cu ‘e autor fisico y esun intelectual di e crimen barbaro aki, lo wordo poni dilanti di husticia.’

E CASO

Tabata diadomingo, cu e informacion a keda publica, cu despues di merdia, a haya un curpa sin bida, di un dama di 20 aña, colga den e cas, caminda pa e di dos piso. Prome informacion policial, a raporta esaki como un caso di suicidio. Personal di ambulance na e sitio, a purba di haci lo posibel pa wak si toch tabatin salbacion, pero envano. Te cu dialuna, tur cos tabata mustra pues cu e tabata un caso di suicidio.

BUELTA DIFERENTE

Ta ora cu e famianan a dicidi di papia, cu cos a dal un buelta, y comberti su mes den un ’posibel’ caso di homicidio. Esaki, pasobra oficialmente, polis no a duna indicacion di esaki, segun informe di NoticiaCla.com.

PETICION DI FAMIA

Pa loke ta e famia, den e carta nan ta sigui pidi, pa tur hende cu kier uni na nan causa, pa prueba cu e caso no ta un suicidio, pa uni na nan. E informacion cu nan lo tin, y e indicacion cu nan tin, ta mustra cu dificilmente ‘Mia’ lo a comete e acto di desesperacion aki. “P'esey nos ta conciente y sigur cu e mes no por a comete tal estupidez,” e famia ta caba e carta publico. (Lesa e carta aki).NOTA, den e carta cu NoticiaCla.com a ricibi, e fam ta robez skirbi, esta Bescosme, envez di Benscosme.