Gobierno mes ta forma obstaculo pa mas seguridad riba laman

ORANJESTAD – Cu un ley di nabegacion nobo, gobierno ke forsa mas seguridad riba laman. Pero den practica, e mes ta forma un obstaculo. Asina den futuro, boto mester tin un radio, hasta ora nan keda den awanan teritorial di Aruba. Pero pa un radio, e doñonan di boto mester di un 'permit', asina un otro ley cu ta regla asunto di telecomunicacion ta bisa. Esaki ta un procedura, cu ta tuma lunanan largo: di control di e radio ta un decreto, cu minister mester firma.

FALTA

Especialmente e ultimo aki, por tuma hopi tempo, pasobra firmamento di 'permit' pa radio di boto, hopi biaha, no ta un prioridad di minister. Ademas, tin un falta di personal na Directie Telecommunicatie Zaken, ke men esnan cu entrega un peticion, mester warda nan 'permit', minimalmente seis luna. Un otro problema, cu e doñonan di boto ta indica, ta e gastonan di e 'permit'. Boto chikito pa cada peticion, ta paga 240 florin na retribucion, costo di seya, keur incluso 100 florin na consecion. E delaster suma aki, mester paga tur aña. Ademas, e 'permit' ta pa cinco aña, ke men e ora ey, e proceso ta cuminsa di nobo pa e doño di boto. Boto mas grandi ta paga 604 florin pa peticion, 250 florin pa aña na consecion. Compra di e radio tambe ta caro, piscado George ta bisa, pa motibo di e impuesto di importacion halto. Casi tur dia, e ta para den haf di Oranjestad, ta limpia loke el a pisca. George ta bini di un famia, cu tin añanan largo ta pisca caba. “Piscamento ta mescos cu hungamento di placa den e casino mi tras aki. Bo no sa nunca cuanto e ta deha pa dia.”

GASTONAN DI SEGURIDAD

E ta spera, cu gobierno lo sinta na mesa cu e piscadonan y e otro doñonan di boto, prome cu e ley nobo drenta na vigor. “Pa nan por tende, cu cua problemanan nos ta luchando berdaderamente. Bo por exigi si, cu nos mester hasi mas na seguridad. Pero den e tempo economico aki, hopi hende ta wak prome, cuanto esey lo bai costa nan.” Presidente Clifford Rosa, di e centro di peskeria Hadicurari, ta bisa cu gobierno por bini cu ley, pero den practica, seguridad riba laman ta un problema complica. Esaki a sali na cla atrobe luna pasa, ora mester a salba cuater piscado riba laman y e instancianan envolvi, pa di tanto biaha a reuni tocante con pa evita esaki. Algun siman despues, tabatin e incidente di La Rumbera, e speedboat cu nuebe hende a bordo, cu despues di un operacion di salbamento internacional, cu a dura dianan largo, apenas a logra di salba nan mes curpa banda di Colombia. Rosa, a keda sin drumi dos dia, pa motibo di e accion aki. “Mi tambe a yuda busca.” Rosa ta reconoce, cu gobierno mes ta lanta obstaculo, manera cu un 'permit' pa radio. Hulanda na 2008 a cambia pa un 'permit', segun registracion y segun Rosa, esaki lo kita e obstaculonan sigur .

BIRA CONSIENTE DI E PELIGERNAN

Pero si puntr’e kico ta su prioridad, e ta contesta: “Educacion.” Miho gobierno, empeña pa un concientizacion mas grandi di e peligernan riba laman. Y e educacion pa haña e 'permit' di nabega, tambe mester bai un nivel mas halto. “Aruba ta cana patras riba Corsou y hasta riba Boneiro chikito.” Hadicurari ta sali pa interesnan di piscadonan, tog Rosa ta bisa, cu nan mes por hasi mas, na nan propio seguridad. “Na 2009 nos a regala pakete di rescate. Despues nos a puntra wardacosta y polis maritimo, si nan tabata mira nan na bordo di barconan, ora nan controla. Mayoria biaha e contesta tabata no.

For di : Ret Karibense   Autor y foto : Sharina Henriquez