KvK: Ley di VAS ta bon pero introduccion ta uno abrupto

ORANJESTAD - Ley di VAS ta bon, pero introduccion ta uno abrupto. Asina Presidente di Camara di Comercio (KvK), Daphne Lejuez, a bisa NoticiaCla.com dialuna anochi. A puntra Lejuez, si KvK ta di acuerdo, cu e carta cu e Asociacion di Conseheronan di Impuesto (AVvB) a manda pa Minister diabierna, pidiendo pa un extension di e ultimatum, cu e ley nobo ta stipula. Manera ta conoci, e ley di Declaracion di Impuesto (VAS) awor ta stipula, cu pa mas tarda 30 di december 2015 mester entrega y paga mesora. Algo cu AVvB a bisa den un carta, cu nan no por cumpli cu ne. Minister Bermudez di Finanzas a bisa NoticiaCla.com, cu esaki ta un asunto di ‘ehecucion’ y cu ‘e oficina di impuesto lo atende cu e asunto.’

CONTENIDO DI E CARTA TA COMPRENDIBEL

Segun Lejuez, e contenido di e carta di AVvB ta comprendibel, mirando e cantidad grandi di trabou cu esaki lo trece cu ne. “ Pero tambe, e situacion di 'cash flow' di comerciantenan, cu kizas no a conta riba un pago a corto plaso y den un solo biaha,” Lejuez a bisa. Di otro banda, KvK, segun Lejuez, no a wordo aserca pa AVvB oficialmente, over di esaki of a ricibi copia di e carta aki, prome cu e la wordo manda.” Pero si, nos a tende for di algun di nan miembro, cu e preocupacionnan aki ta existi entre nan miembro, mirando e implicacion cu e ley aki tin pa cu cumplimento cu e 'deadline'.” Esaki pasobra e ta creando un peso, pa tanto e accountants, como tambe pa e negoshinan. “KvK ta kere, cu e ley lo por yuda mehora e 'compliance', pero su introduccion ta keda uno abrupto y mester a tene consideracion, cu e retrasonan actual y duna uitstel parcial, pa por entrega esakinan.”

BISHITA NA PARLAMENTO

Ademas, segun Lejuez, KvK, Atia y Ahata a hasi un bishita na Parlamento e dia prome cu VAS lo wordo trata, na unda a presenta varios sugerencia, di parti di un experto na nomber di Atia . “ Aki a pidi pa considera extension na nan, pa asina no crea un situacion caotico fin di aña y pa nan por 'meet' e 'deadline' proponi.” Segun Lejuez, Parlamento a pasa e ley 'as is, where is', "ya cu cambionan den ley, lo crea tardansa den su introduccion y no kier a warda mas." Y cu supuestamente, Minister lo a keda di pasa e cambionan apart via besluit. “ Pero nos no a tende nada concreto over di esaki,” Lejuez a finalisa bisando.