Minister a priminti CAFT introduccion di ABB pero no a cumpli

ORANJESTAD – Motibo, cu Presidente di College Aruba Financieel Toezicht (CAFT), Age Bakker, a cambia su postura durante e ultimo bishita na september na Aruba pa uno ‘positivo’, tabata basa riba un promesa, cu Minister Bermudez (finanzas) a duna e biaha ey. Bakker a sinta cu NoticiaCla.com dialuna atardi, y splica kico a pasa e biaha ey. “El a priminti nos introduccion di e ABB (Algemeen Bestedings Belasting). Y esey lo a soluciona parti di e problema di presupuesto 2016. Algo cu awor a resulta di no ta e caso. Awo nos ta bin Aruba y ta tende cu a dicidi cu ta pospone esaki." Y e mensahe segun Bakker awor aki na gobierno, tabata uno cla: Prome cu fin di januari 2016, gobierno mester introduci un medida cu ta genera 50 miyon florin extra.

BERMUDEZ A PRIMINTI CAFT INTRODUCCION DI ABB

Tabata durante e ultimo bishita di Bakker, cu NoticiaCla.com a puntr’e con bin, cu siendo cu tabatin un rapport asina negativo (e tempo ey caba) riba e cifranan di gobierno, cu toch diripiente, despues di un simpel combersacion cu e mandatario, Bakker a bira asina positivo atrobe. E tempo ey, Bakker no kier a bisa mucho. E biaha aki, durante su combersacion cu NoticiaCla.com, el a comparti pues kico realmente a sosode e tempo ey. Ora cu Bermudez a haci e promesa biaha pasa, CAFT tabata satisfecho. “Nos a dun'e nos sosten mesora,” Bakker a sigui bisa. Algo cu awor pues, a resulta di no ta berdad. Y esey Bakker ta lamenta.

FORMA PA GENERA 50 MIYON PA FIN DI JANUARI 2016

E motibo, cu Bakker ta lamenta cu e plan di ABB no ta continua, ta pasobra e tabata un bon plan, cu por a genera suficiente placa (a calcula 50 miyon), cu mester a soluciona gran parti di e problema financiero. Ademas, Bakker a compronde (di su combersacionnan cu gremionan) cu comercio ta considera e ley aki como ‘husto’, y facil pa colecta y cu tin un miho ‘compliance’ pa medio di su simplicidad. “Si esey no logra, wel, e ora bo mester bin cu otro forma (pa genera placa). Y aki mi kier mira pa haci algo, no na aumenta impuesto, pero wak e banda di gastonan,” Bakker a sigui bisa. Y aki ta unda cu BAKKER a mustra cu enberdad, gobierno mester haya un forma, prome cu fin di januari 2016, cu ta genera 50 miyon florin. “Corecto, mi no por a bis’e miho,” Bakker a finalisa bisando.