Festival di Dande ta diadomingo riba Plaza Turismo

ORANJESTAD - Presidente di Fundacion Cultural di Festivalnan Folklore, Dande y Himno y Bandera (FCFFDHB), Sr. Harry Croes, ta hopi contento y satisfecho con e inscripcion a bay. Diadomingo pa 4’or di atardi, na Hamaka riba Plaza Turismo, a tuma luga e inscripcion, pa e festival di Dande y Composicion Tipico, caminda un total di 14 agrupacion musical a inscribi, un total di 34 cantante pa Dande y 9 cantante pa Composicion Tipico. Tur esnan cu a bini inscribi, a ricibi e reglamento pa composicion tipico y esun pa Dande.

INSCRIPCION

Bou di un ambiente ameno, e inscripcion a tuma luga y banda di 6:30 p.m., a cera e inscripcion. T’asina, cu mirando cu a ricibi solamente 2 inscripcion pa hubenil, un solo festival lo tuma luga, riba diadomingo 20 di december venidero, cu lo inicia pa 6’or di atardi. E dos hobennan lo competi riba diadomingo, hunto cu e adultonan y cada uno den nan categoria.

TIRAMENTO DI LOT

Sr. Harry Croes, Presidente di Fundacion di Festival di Dande (FCFFDHB), ta invita tur esnan cu a inscribi, pa bini riba diaranson 16 di december 2015 pa 6’or di atardi, na Hamaka riba Plaza Turismo (Linear Park). Caminda lo tira lot y splica un cu e otro di e festival, p’asina nos tin un gran festival di Dande, na ocasion di su celebracion di 40 aña. Un peticion ta bay na tur esnan cu a inscribi, pa trece nan letra di Composicion Tipico (den cuater copia) riba e diaranson durante tiramento di lot, p’asina cuerpo di hurado por haya esakinan na tempo.

SPONSORS

Gradiciendo tur patrocinadonan, RBC Royal Bank, FCCA, Setar N.V., Big Wheel Lottery, Balashi Brouwerij y apoyo ricibi di Gobierno di Aruba, CCDN, Departamento di Cultura Aruba y e pueblo di Aruba, cu a pone un biaha mas confiansa den e Festival di Dande.

INVITACION

Pueblo di Aruba ta keda cordialmente invita, pa e celebracion grandi aki di nos Dande, nos Tradicion, ariba diadomingo 20 di december proximo riba Plaza Turismo.