Ainda Aruba no tin un presupuesto permanentemente sostenibel

ORANJESTAD – A pesar di e esfuersonan cu Aruba a haci -den cual caso no por lubida esunnan haci na nivel gubernamental- pa cumpli cu e palabracionnan haci den e Convenio di Presupuesto Balansa (BBA), CAft ta constata cu e presupuesto di 2016, na e momentonan aki, no ta permanentemente sostenibel. Asina Presidente di e Colegio di Supervision, Age Bakker a bisa, durante un conferencia di prensa dialuna atardi. Segun Bakker, aunke e balor di informacion a mehora, e presupuesto aki, ainda ta mustra un deficit excesivo. Ademas, CAft a bay di acuerdo cu peticion di gobierno, pa aplasa e presupuesto 2016 te fin di januari proximo, ya cu ta bisto, cu lo no logra esaki prome cu 15 di december, esta diamars awor. “CAft lo conseha, Conseho di Ministro di Reino, positivamente tocante esaki,” Bakker a bisa.

CONSEHO PA PRESUPUESTO

Den su conseho, tocante e proyecto di presupuesto di 2016, CAft ta yega na un deficit di financiamento di 2,9% di e PNB, loke ta mas halto cu e 2,0% cu Aruba ta conta cu ne. Den e caso aki, CAft ta mantene e opinion, cu e entradanan adicional spera di e medidanan di cobransa, ta mucho optimista. A base di e expectativa, cu Aruba mes a indica cu introduccion di e Impuesto General di Consumo (ABB), cuminsamento di 2016, lo produci alrededor di AWG 50 miyon na recurso adicional, pa motibo di un porcentahe di cumplimento (compliance) inherente mas halto, CAft a recomenda, pa finalisa e legislacion corespondiente mas pronto posibel. Si esey no ta factibel, CAft ta recomenda, pa reahusta un total di alrededor di 1% di e PNB (alrededor di AWG 50 miyon), na e parti di gasto. Tambe lo mester acelera, elaboracion di e proyecto di presupuesto di 2017, di tal forma, cu lo realisa entrega na tempo dia 1e di september 2016. E ora ey un aprobacion na tempo, door di Parlamento prome cu dia 1e di december, por ta posibel.

BISHITA DI CAFT NA ARUBA

Ademas di e conferencia, CAft a emiti un comunicado y splica aki, loke nan a haci durante nan bishita na Aruba. En total, CAft tabata di bishita na Aruba dianan 10, 11 y 14 di december. E deliberacionnan cu CAft a tene, tabata principalmente centralisa, riba ehecucion di e presupuesto di 2015 y e planificacion respecto aprobacion di e presupuesto di 2016. Banda di esey, Departamento di Obra Publico (DOW) a tene un presentacion pa CAft, tocante e proyectonan di infrastructura, cu a contrae den forma di cooperacion publico-priva (PPP). Segun Presidente di CAft, Age Bakker, na nivel gubernamental ta tumando paso den bon direccion - di acuerdo cu e palabracionnan den e Convenio di Presupuesto Balansa (BBA) - pa mehora finansa publico di Aruba. Sinembargo, ainda no por papia di un presupuesto permanentemente sostenibel. Pa por alcansa e normanan di deficit cu Aruba a fiha pa 2015 y e añanan siguiente, un esfuerso intensiva y carga ampliamente, ta imprescindible.

DELIBERACIONNAN DI CAFT

Durante e prome dia na Aruba, e presidente y e miembronan a bishita Conseho Consultativo di Aruba, sigui pa asistencia na presentacion di DOW tocante e PPPnan. Durante e presentacion aki, a informa e miembronan di Colegio, detayadamente, tocante e dos proyectonan grandi di caminda periferico (ringweg) na Aruba: Coredor Berde (Green Corridor), cu ta den construccion for di e di tres trimester di 2015, y Watty Vos Boulevard, di cual e construccion ta programa, pa cuminsa banda di maart 2016. E otro bishitanan tabata na Gobernador, Ministro di Finansa, Conseho di Ministro y e Comision di Finansa y Asunto Economico di Parlamento. Tambe a haci un bishita di trabou na Banco Central di Aruba. Durante e combersacionnan di CAft, a tuma luga intercambio di informacion tocante, entre otro, e cuenta anual di 2014, e reportahe di ehecucion di e di tres trimester di 2015, e prome modificacion presupuestario di 2015 y e planificacion respecto e presupuesto di 2016.

EHECUCION DI E PRESUPUESTO DI 2015

CAft a ricibi e di tres reportahe di ehecucion di Aruba, dia 17 di november 2015. Den su conseho tocante esaki, CAft ta señala, cu implementacion di e medidanan di consolidacion te cu september u.p., ta cana atras pa loke ta e planificacion. Den su conseho tocante e presupuesto supletorio di Aruba, CAft ta constata, cu e crecemento di e gastonan, no ta bou di control, si considera e excesonan cu ta spera. A base di esaki, lo rekeri extra esfuerso pa alcansa e deficit di financiamento di 3,7% programa pa 2015.