Husticia ta pone man riba gang di bendedornan di arma di candela

ORANJESTAD - Ministerio Publico y Cuerpo Policial di Aruba, recientemente, a pone man riba un organizacion criminal, cu tabata ocupa su mes, cu traficacion y benta di arma di candela, cualnan probablemente, tabata wordo treci Aruba, desde Venezuela como contrabanda. Despues di un tip, a forma dos team special di investigacion, den e prome siman di november 2015, cu a focus riba investiga e bendedornan y e cumpradornan, di e armanan di candela aki.Riba 12 di november, a detene e prome cinco sospechosonan. Den huiszoekingnan a haya y a tuma den beslag, cuatro arma di candela. Riba 19 di november, dos otro sospechoso a wordo deteni y dos arma di candela, a wordo tuma den beslag. Riba 25 di november, e ultimo persona a wordo deteni. Cerca dje, a wordo haya un arma di candela. Mientrastanto e investigacion ta practicamente cla. Na e momento aki, tin ocho sospechoso den detencion. Cinco di nan ta, supuestamente, e bendedornan di e armanan di candela. Den total, ocho arma di candela, a wordo tuma den beslag. E sospechosonan ta Arubiano cu nacionalidad Hulandes, y Venezolanonan.