Kijkdag pa vehiculo na diferente localidad di polis

ORANJESTAD - Alto mando di Cuerpo Policial di Aruba ta organiza e segundo “kijkdag” di aña 2014 relaciona cu tur e vehiculo (autonan y brommernan) staciona na diferente warda di polis. Algun di e vehiculo a wordo tuma den beslag durante accion di trafico di polis, algun vehiculo a wordo haña banda di caminda of den mondi door di polis, algun vehiculo ta procedente di ladronicia, etc.

Cuerpo Policial di Aruba ta organisa e kijkdag aki pa publico por wak e vehiculo y demostra cu documento cu un vehiculo ta di nan of cu nan tin tur documento na ordo. E dia pa esey ta diabierna 01 augustus 2014 na warda di Noord, San Nicolas, Santa Cruz y Balashi. E orario ta di 13.00 pa 16.30 or. E persona cu ta bay pa regla su asunto por pidi na cada warda di polis pa e Chef van Dienst y na Balashi pa sr. Matthew Werleman, Chef Beheer Vervoersmiddelen.

Tene cuenta cu den cierto caso KPA ta autorisa pa cobra e suma di Afl 25,- pa cada dia cu un vehiculo ta riba tereno di KPA (Retributie- en legesbesluit Korps Politie Aruba 2002). Apart di esey si e ta un caso di papelnan vigente (seguro, belasting, etc.) e doño mester tin tur su papelnan na ordo y paga tur e boetnan habri.