“Olive” a bira “Royal” y lo habri probablemente mitar di otro luna

ORANJESTAD – Si tur cos ta bon, mitar di otro luna, Royal Funeral Home, lo cuminsa su operacion oficialmente. Den fin di siman, e nomber di e funeral anterior ‘Olive Three’, a cambia oficialmente riba e edificio, poniendo fin oficial na e operacion anterior. Un findishi, siman aki ainda, di e muebles, ta indicacion cu ainda e proceso ey, no ta completamente finalisa, pero esey tambe lo mester keda cla pronto. “Solamente si nos haya nos mes pura, prome cu fin di aña, nos lo habri prome”, Anthony Latham a bisa NoticiaCla.com awe mainta.

MOTIBO PA CAMBIA NOMBER

Latham a sigura NoticiaCla.com, cu e unico motibo cu - siendo cu ta nan mes a cumpra e negoshi na findishi - lo no yame ‘Aurora’ tambe, ta pa evita confusion ora di entiero. “Bo no por hayabo den un situacion, cu bo ta manda hende na entierro di p.e. sra Tromp, na e lugar robez”, Latham a splica. Pues pa evita un confusion ora di entiero, a dicidi di pone un otro nomber pa e lugar. “Esey ta e unico motibo. Tur otro cos ta keda mescos”, Latham ta sigura. E mesun compania cu ta doño di Aurora Funeral Home y cu ta maneh’e, tambe lo ta encarga cu Royal Funeral Home. Eynan nada no ta cambia.

COMPRA DI EDIFICIO

Manera ta conoci caba, recientemente Latham a cumpra e edificio pa 2.4 miyon florin, despues cu e doñonan anterior, a lag'e bay y no por a maneha esaki mas financieramente. Banco dado momento, a tuma e operacion over, pero despues a pasa pa bende esaki na findishi, unda cu Latham su compania, a cumpra esaki tambe y mesora a cuminsa e tramite, pa drenta den dje. Aworaki ainda no ta cla pa haci esey. Ta trahando paden pa drecha e lugar, ya cu e estado paden, no ta mucho bon. Y ta premira, cu pa mitar di januari otro aña, lo por habi’e pa servicio di funeraria.