Plasterk: Supervision externo riba eleccion di paisnan den Reino

DEN HAAG – Minister Ronald Plasterk (PvdA), di Asuntonan di Reino, ta bay consulta cu gobiernonan di Aruba, Corsou y St Maarten, pa yega na un acuerdo conhunto, cu den henter Reino Hulandes mester garantisa un proceso husto di eleccion. E matutino di Corsou, Antiliaans Dagblad a raporta esaki, den su edicion di diabierna ultimo. (lesa e articulo original aki).

RUMORNAN RIBA MANIPULACION DEN ELECCION

Segun e matutino, e mandatario, a haci e promesa ey diahuebs, den un debate, cu comision di Tweede Kamer pa relacionan di Reino. A base di rumornan, recurente riba e islanan, riba e posibel manipulacion of cumpramento di voto, e Parlamentario di PvdA, Roelof van Laar, a bin cu e idea pa haci compromisonan, pa bin cu supervision externo, durante eleccionnan. Tambe el a bringa pa e islanan BES, cu ta cay bou di responsabilidad hulandes, pa haci un investigacion riba e cantidad halto di apoderacion, en relacion cu e proporcion extremo, den cual esaki ta tumando lugar. E fenomeno ey lo por indica posibel fraude di voto.

SUPERVISION DEN REINO

"Bon gobernacion ta cuminsa cu bon eleccion. E supervision for di Reino Hulandes, mester ta mas fuerte. Nos por invita observadornan internacional. Awor, nos no sa si e rumornan aki ta berdad of no. Pero mester bin un fin na esaki, tambe si e rumornan ta falso, pasobra nan ta mina e confiansa den democracia”, van Laar a sigui bisa.

PLASTERK DI ACUERDO PA SUPERVISION

Plasterk a informa e ora, cu e ta na altura di e rumornan, aunke no ta specifica riba cua isla specifico, ta papia di e fraude ey. Mes momento, e mandatario ta bisa, cu no a haci ningun denuncia riba ningun isla, mientras cu ta papia di un hecho castigabel serio, pa cual tin un castigo halto pe. “Pa e cantidad halto di apoderacion, por tin un splicacion confiabel tambe”, Plasterk a bisa. E ta bisa sinembargo, cu e ta sinti si pa e idea, pa ora cu tin eleccion den Reino Hulandes, pa tin supervision di observadornan independiente, y a priminti pa toca e tema, cu e otro paisnan den Reino.