De Meza optimista pero cu cautela for di Houston riba Citgo

ORANJESTAD – Optimista pero cu cautela, ya cu e ta un asunto hopi compleho. Asina, e mandatario di utilidad, Minister Mike de Meza, a pone riba su pagina personal di Facebook, den fin di siman, riba e desaroyo di refineria. El a bolbe for di Houston, unda cu el a reuni cu e ehecutivonan di Citgo. “Mi tabatin algun dia hopi interesante di reunion, negociacion na Houston, Texas”, e mandatario a bisa. Pero mes momento, e ta mustra cu e mision ta uno, cu ta tuma hopi tempo y cu no mester wordo tuma sin mas. E mandatario a biaha siman pasa dialuna pa Houston, y a bolbe Aruba den fin di siman. Fin di luna awor, mester tin un contesta fiho di Citgo, si ta cumpra e refineria of no.

MENSAHE RIBA FACEBOOK

Riba e mandatario su pagina, e mandatario no a sconde su alegria y entusiasmo si. “Siiii, e luz (di faro) ta briyando mas hopi y e zonido (pings) ta zona mas duro cada bes. Nos ta progresando y moviendo dilanti, paso a paso y consistente den e direccion bon y positivo”, e mandatario ta cuminsa na bisa. Pero mesora su tras, e tin palabra di cautela. “ Mi mester acepta, cu e materia ta keda uno compleho y ta tuma hopi tempo y ta un mision, cu no mester wordo tuma sin mas. Bo por ta sigur, cu e bon ta na caminda pronto, y cu e miho ta definitivamente cla pa bin”. Apenas un dia despues, su mensahe tabata mas interesante. “Imaginabo. Reapertura di Aruba su refineria na 2016, boramento pa gas/petrolio na 2016. Waw! Y bon y miho cu tabata na caminda, ta riba caminda awor. Nos a priminti y nos lo cumpli”, de Meza su mensahe tabata.