Señal eroneo di candela a causa capitan di InselAir bati alarma

ORANJESTAD – Señal eroneo den cabina di piloto, a causa cu tabatin un alarma grandi, pa un avion di InselAir rumbo pa Corsou diadomingo merdia. CEO di InselAir Aruba, Frederick Nuboer a confirma na NoticiaCla.com esaki. “E crew di e Fokker 50, a haña un señal eroneo cu un di e motornan a sobre calenta,” Nuboer a bisa. “ Pa e motibo aki, a activa e procedura di safety pa paga e motor,” e CEO a sigui bisa. Na final, tur cos tabata ok y no tabatin mayor preocupacion.

E INCIDENTE

Tabata diadomingo atardi, cu un avion Fokker 50 cu 50 pasahero, a raporta na toren cu tabatin indicacion cu un motor tabata na candela. Mesora a bati alarma grandi y cera pista di aeropuerto. Bomberonan a tuma accion mesora, y asisti entre otro e tripulacion, pa evacua e pasaheronan abordo. Algun di e pasaheronan, segun informacion cu NoticiaCla.com a haya, a keda trata pa susto cu nan a pasa aden durante e incidente. Un control despues di tecniconan, a confirma cu ta trata di un señal falso, cu e aparato a duna, y cu ningun momento tabatin candela den e motor. Mesora a habri pista bek pa operacion por a continua.