Departamento di impuesto ta defende fecha ‘nobo’ pa ley di VAS

ORANJESTAD – E cambio di ley, di entrega di declaracion di impuesto di ganashi, no ta algo nobo. Vocero di departamento di impuesto, sra. Meverly, a splica cu e ley aki, tabata den “pipeline” algun luna caba, pero departamento di impuesto, no por ehecuta nada, tanten cu e cambio di ley, no wordo aproba den parlamento y ta te ora cu e aprobacion tuma luga, cu e publicacion oficial tuma luga, e ora, nan ta haya e encargo pa ehecuta e ley aki.

TRAYECTO DI LEY

"E ley a pasa den parlamento den november, e ora e trabou pa nos a cuminsa. Nos tambe ta core cu tempo, pasobra e ley ta encera manera cu parlamento a aprob'e, cu e ta conta entrante aña fiscal 2014 caba, cual a pone presion riba nos y cliente, pa haci tur e preparacionnan y percura pa e clientenan haya nan declaracion, di acuerdo cu e cambio di ley. E ta un presion enorme aworaki, net den fin di aña, esey ta berdad, pero laga nos pensa tambe, cu nos ta na final di december, normalmente si no tabatin un cambio di ley mes, nos lo a saca e aangifte den mei/ juni, e ora di acuerdo cu e ley bieu, e cliente lo a haya dos luna, pa e entrega su aangifte, cual ta mas o menos final di juli of begin augustus." Asina e portal bondia24 ta raporta.

HENTER AÑA PA PAGA

Aworaki ta papiando di 2014 y ta na final di 2015, kiermen e clientenan basicamente, a haya henter e aña pa prepara nan cuenta anual caba, cual ta un rekisito cu no a cambia. Solamente cu e no tabatin un declaracion of un deadline. Mientrastanto ta kere cu basta cliente, lo tin nan papelnan prepara. December ta un luna basta kibra, mirando e dianan di fiesta, pero nos ta confia cu empresanan, lo por ta basta leu cu nan documentonan.

POST

Otro problema ta, cu no tur cliente a haya e aangifte den nan post. Ora a yama post y puntra ki dia lo entrega esaki, e contesta ta, cu lo no haci esaki mas y e cliente mes, mester busca esaki na postkantoor.