Gobernador Refunjol na celebracion 350 aña marinier na Hulanda

ROTTERDAM – Gobernador di Aruba, Fredis Refunjol, tabata testigo di e defile riba tera y den laira di Cuerpo Militar hulandes na Rotterdam. Asina, a celebra e 350 aña di existencia di e cuerpo. Su mahestad Rey Willem Alexander, tabata invitado di honor na evento aki.

E EVENTO

Mas of menos 2000 marinier y veterano, a participa na e parada na Coolsingel. Hopi aparato moderno, pero tambe otronan historico antiguo a participa. E defile den laira, a consisti di 6 helicopter y un avion di transporte, tipo Hercules C130. Riba tera, tabatin participacion tambe, di un unidad di Marinier Real Britanico. Esaki, pa simbolisa e decennia di cooperacion entre e dos paisnan. Durante e evento, Minister di Defensa, a elogia e mariniernan den su discurso. Gobernador di Aruba tabata presente y a topa cu hopi personahe importante di e Cuerpo di Marinier, durante un recepcion.

HISTORIA DI MARINIERS

E Cuerpo di Mariniers, a wordo funda riba 10 di december 1665 pa Johan de Witt, y Admiral Michiel de Ruyter. Nan a sinti cu un regimen di marinier tabata indespensabel, cu e asistencia di Hulanda, como un pais comercial, den e ‘siglo di oro’. Mariniernan awendia ta activo na e mision na Mali y e combatimento di pirateria, dilanti di costa di Somalia. Aruba tin tambe presencia di e mariniernan, situa na Savaneta den Marinierskazerne, y ta wordo guia bou di Comandante Jan ten Hove. Na Aruba tambe e Cuerpo a celebra, den forma di un recepcion, na ‘Marine Verlof Centrum’, na Eagle, unda cu centenares di invitado, incluyendo Gobernador Interino, Ella Tromp Yarzagaray, tabata presente.