Careda di bicicleta "Saliña Night Sprint"

ORANJESTAD - Pa coredonan di bicicleta, Radio Shack no ta conoci solamente pa benta di bicicleta y acesorionan, sino tambe pa ta organisa algun di e miho eventonan pa entretene ciclistanan. Ta den e cuadro aki a anuncia e "Saliña Night Sprint" diasabra dia 2 di augustus na e saliña dilanti Fisherman's Hut cuminsando for di 3:00pm te cu 11:00pm. Muchanan ta core gratis, mientras cu adultonan ta paga un suma chikito. E evento aki ta encera un careda cortico, pero unico y hopi entretenido, cu obstaculo tur caminda. Nan ta considera e careda aki un "short-track mountain bike racing" di 1/2 miya. Ta recomenda uzo di bicicleta modelo "mountain bike" pa surpasa tur e obstaculonan.

Registracion ta gratis pa e muchanan y participantenan den categoria "junior". Coredonan di bais den categoria di "beginners" ta paga 10 florin mientras cu tur otro categoria ta contribui cu 15 florin. Pa registra adelanta, por manda un email pa teamradioshack.aruba@gmail.com te dia 29 di juli. Tambe por inscribi personalmente na Radio Shack te dia 30 di juli pa 6:00pm of na Roadside Cafe riba Linear Park te dia 30 di juli pa 8:30pm.

Coremento di bicicleta ta probablemente un di e disciplina nan di deporte cu mas ta creciendo ultimo añanan. No solamente e ta bon pa bo salud, pero tambe e ta masha entretenido pa den grupo di famia y amigo bo organisa caredanan tur rond di nos isla. Aparte di tur esey, un keiro riba bicicleta ta permiti bo aprecia nos naturalesa y e beyesa di nos isla mas ainda, cu ora bo pasa cu velocidad halto den auto. Specialmente pa e evento aki, ta purba atrae mas mucha y participantenan den e categoria di “beginners” pa cual a prepara un ruta adapta y adecua pa e dos grupo aki. Lo tin un bar y cushina bon surti durante e evento, cu lo bay compaña pa bon musica di DJ. Mescos cu pa e evento aki, muchanan tambe ta bon bini y por disfruta mesun hopi cu e adultonan durante e "Saliña Night Sprint" cu ta tuma luga e weekend aki.