Acuerdo historico riba clima mundial cera na Paris

PARIS – E casi 200 participante, na e cumbre di Nacionnan Uni riba clima, a cera un acuerdo riba nos clima, cu ta encera entre otro, reduccion di emision di gas di efecto invernadero. Reino Hulandes tambe tabata presente den persona di Prome Minister di Aruba, Mike Eman, y un delegacion di mas minister y representante. Despues di casi un siman y mei di reunion, tur participante por a haya otro y acepta un acuerdo, y a compromete na tene nan mes, na e acuerdo firma.

MARTIU

Despues di e anuncio di e acuerdo, tabatin un momento di aplauso y grito den e sala di reunion. E Presidente di e Conferencia, Laurent Fabius, a interumpi e gritamento, pa seya e acuerdo historico cu un bati di martiu. “Nan a bisami cu mi mester bati e martiu. E ta un martiu chikito, pero cu ta culmina algo grandi," Fabius a bisa.

PUNTONAN IMPORTANTE

E puntonan mas importante di e tratado, ta e reduccion di e calentamento global te maximo 2 grado, cu 1.5 grado di calentamento como obhetivo, e reduccion masivo di e emision di e gas invernadero, y tambe e inversion den paisnan pober, cu tin dificultad pa yega na e metanan di clima. Presidente Frances Françios Hollande, a haci mencion di un acuerdo historico. Segun e Presidente di e Conferencia, Fabius, e tratado ta conduci na un momento crucial den uso di combustibel fosil manera zeta, gas y carbon. Tanto companianan, como gobiernonan mester cambia pa uso alternativo di fuente di energia, segun Fabius. Foto cortesia AFP.