Aunke diasabra ta 'free parking', parkeermeter ta sigui traha normal

ORANJESTAD – No obstante cu diasabra awor (12 di december), 'parking' ta pornada den centro di ciudad, e parkeermeternan lo ta trahando normalmente, mirando cu ta dianan cu normal nan ta opera, caminda si un persona bay pa tira placa den e machine, esaki lo tuma e placa manera custumber. “ E machine aki lo no duna placa back y pa e motibo ey, nos kier pa tur hende ta bon na altura di esaki,” e compania a bisa, pa medio di un comunicado. Manera ta conoci, gobierno recientemente, a anuncia 8 dia di parkeer gratis den centro di ciudad, unda cu normalmente mester paga. E di tres dia ta pues mayan, 12 di december.

REGLANAN DI PARKEER TA KEDA VIGENTE

Aruparking ta recorda un y tur, cu esaki lo no bay sin e reglanan vigente di parkeo. Pa e motibo aki, nos kier a repasa esaki nan, pa ningun hende haya nan den un situacion, caminda nan lo sali perhudica pa falta di informacion. Diasabra 12 di december pues, lo ta e siguiente dia cu lo ta liber pa parkeo, den e vaknan blanco den centro di nos ciudad. Cu esaki, nan kier pa ta hopi duidelijk, cu e personanan cu tin parkeervergunning y ta traha den centro di ciudad, ta wordo pidi encarecidamente, pa uza nan lugar di parkeo normal, dus nan vaknan geel di custumber y asina laga e vaknan blanco habri, pa e clientenan, por haya lugar di parkeer, pa asina haci nan compras den centro di ciudad. Tambe lo kier, pa ta hopi duidelijk na tur, cu ta bin den centro di ciudad, pa haci nan compras, cu no ta permiti pa parkeer den vaknan geel, si bo no tin un parkeervergunning pa e zona ey specificamente. Den casonan cu esaki pasa toch, lo mester bay over, na tuma paso contra esaki. Mester corda, cu e vaknan geel ta paga pa trahadornan y esaki mester por garantisa nan lugar, riba e dianan menciona. Tambe Aruparking kier pa tur hende corda, cu por parkeer solamente den e vaknan blanco y no ta permiti pa parkeer riba acera of caminda, cu no tin un vak blanco marca. Un biaha mas, nos ta pidi tur automobilista, cu lo bin den centro di nos ciudad, pa tene bon cuenta cu esaki nan, pa no mester haya nan den un situacion indesea.

DIANAN DI PARKEER GRATIS CU FALTA

Aruparking pa medio di e articulo aki, kier a recorda tur automobilistanan, cu riba e dianan cu Gobierno di Aruba a reserva y cu falta ainda, ta, dianan 19, 21, 22, 23, 24 y 31 di december, como dianan di parkeo gratis den centro di nos ciudad.