Aserca a charter 16 buelo pa Aruba sin permiso

ORANJESTAD – E aerolinea venezolano Aserca, a charter 16 buelo extra for di Venezuela pa Aruba, cu ta traduci den un total di 5000 pasahero, sin cu nan a haya permiso di Aruba pa e buelonan aki, aterisa riba nos isla. Fuentenan cerca di e proceso, a confirma na NoticiaCla.com e informacion aki. E asunto lo por bira un problema, mirando cu e aerolinea - no obstante un permiso rechasa -, a bende mitar di e 5000 cuponan caba. Y e prome di e buelonan aki, mester a cuminsa yega Aruba diadomingo awor. 

MOTIBO PA RECHASO DI PERMISO

E motibo cu a rechasa e peticion aki, ta pasobra’ tin suficiente buelo caba for di Venezuela pa Aruba’ y ‘pa motibo di capacidad’, cu lo ta na limite caba, pa atende cu buelonan riba e oranan menciona. Tin un silencio hermetico riba e asunto aki di parti di autoridad di Aruba, unda cu ningun instancia kier papia riba e topico aki. 

EXTRA BUELO COMERCIAL RECHASA TAMBE

Por corda con un tempo pasa caba, Jurgen Benschop como Chief Operating Officer di aeropuerto (AAA NV) a confirma na NoticiaCla.com, cu a haya un cantidad di peticion pa buelo extra for di Venezuela, pero cu a wordo nenga. E motibo ta, cu tur e buelonan aki pidi pa tin un 'time slot' (ora di yegada y salida) mescos cu e otronan, esta den ‘prime time’, cu ta hopi caba. Como tal a dicidi, cu no ta otorga permiso extra pa e buelonan aki. Si nan kier bula otro ora y dia, lo por evalua esaki, pero no den e mesun ora cu esnan cu ta bulanda caba, segun Benschop a bisa e tempo ey.

MESUN TIMESLOT

Conforme e pensamento ey, Directie Luchtvaart a rechasa e peticion di e extra 16 charternan, pasobra nan tambe lo ta kier tin e mesun timeslot, cu e extra buelonan comercial pidi anteriormente. Mientras cu NoticiaCla.com por confirma e noticia, no por confirma e parti di e timeslot pa e charternan, debi cu ningun instancia oficial no kier papia riba e punto specifico ey y e fuentenan no por a confirma e parti ey.

DELEGACION DI ASERCA 

E aerolinea Aserca, ta den un problema serio awor, mirando cu (manera indica caba) e prome di e buelonan ‘bendi’, mester sali pa Aruba diadomingo awor. Y si e buelo no por sali for di Venezuela, esaki por nifica problema na Venezuela, entre e pasaheronan y e aerolinea. Como tal awe mainta, e delegacion di ehecutivonan halto di Aserca, ta yegando Aruba pa reuni cu autoridadnan di Aruba, pa wak con por soluciona esaki.

PERMISO NENGA FOR DI DIALUNA

NoticiaCla.com, a compronde, cu autoridad di aviacion civil, a manda un carta oficial for di dialuna pasa caba, pa e aerolinea, informando nan, cu nan no ta haya e permiso necesario, pa e motibonan menciona. Y no obstante esey, cu un permiso nenga por escrito, toch e aerolinea a continua cu nan plan, pa bende mitar di e 5000 cuponan y programa e prome buelo, pa diadomingo awor.

KEHO DI INAC

Como si fuera poco, INAC (Instituto de Aeronáutica Civil) na Venezuela, a manda un carta pa autoridad di aviacion na Aruba, den cual nan ta protesta riba e asunto di competencia inhusto, cu tin entre aerolineanan di Aruba y di Venezuela. E carta aki ainda Aruba lo no a contesta.