Presupuesto supletorio 2015 ta wordo entrega diabierna

ORANJESTAD – Presupuesto supletorio 2015 di pais Aruba lo keda entrega na parlamento di Aruba diabierna awor. Asina minister di finanza Angel Bermudez a confirma na NoticiaCla.com diahuebs atardi. “E ta den su fase final di preparacion pa e bay parlamento”. Y for di su palabra, e ta sigura cu prome cu fin di aña, e lo ta cla. Ademas, e ta sigura cu den cifras, no a bin cambio. “No tabatin mas gasto cu a presupuesta” e mandatario a sigura NoticiaCla.com. Mester bisa cu NoticiaCla.com mes no a mira e presupuesto supletorio, pues no por husga independientemente si esaki ta corecto ainda.

TRAYECTORIA HIBA

Segun e mandatario ta diaranson a haya e conseho di Raad van Advies y CAFT, y a base di e conseho ey, ta trahando e comentarionan riba e conseho di RvA y lo entrega esaki prome cu fin di siman na parlamento. “Na mi opinion, nos ta bin cla prome cu fin di aña” Bermudez a sigui bisa.