Presupuesto 2016 ta yega Parlamento diaranson otro siman

ORANJESTAD – Manera ta e caso di e presupuesto supletorio 2015, e presupuesto 2016 tambe ta den fase di preparacion. Solamente cu contrario na esun supletorio, e no ta cla pa wordo entrega ainda na Parlamento (e siman aki) y no ta trat'e mas e aña aki tampoco. E hecho, cu e no ta wordo entrega prome cu 15 di december, no mester ta un problema y Minister Bermudez a bisa NoticiaCla.com, cu diabierna mainta, e lo bisa Caft durante nan bishita, di e situacion. Nos ta confortabel, cu den un par di siman, e lo wordo formalisa door di Parlamento.

OTRO SIMAN DIARANSON PA PARLAMENTO

Directie Financien ta trahando riba e presupuesto ainda y e mandatario kier, pa diamars awor, Conseho di Minister aproba esaki, pa despues e sigui cu trayecto legislativo, cu ta Parlamento. “Nos meta aworaki ta, pa entrega e presupuesto 2016, no mas tarda cu otro siman diaranson,” Bermudez a sigui bisa. E hecho cu e ta laat, segun e mandatario, no mester ta un problema. “Ningun hende no por tin critica riba dje,” Bermudez a bisa, indicando cu ta un di prome biaha, cu presupuesto ta cla na comienso di aña. Ademas e ta recorda, cu prome cu e ley Laft, (cu ta stipula cu Caft mester tin un copia di e presupuesto aproba pa dia 15 di december mas tarda), tin e ley di comptabilidad, cu ta stipula, cu e presupuesto mester ta entrega, mas tarda 1 di september e aña anterior. “Manera cu nos tur sa, pa decada esey no ta logra, pa motibo di entre otro, e capacidad di Directie di Financien, cu mester prepara e presupuesto,” Bermudez a bisa. “Den e caso aki nos kier entreg'e otro siman."

CUMPLI CU LEY DI AFT OF NO

E hecho cu no ta cumpli cu e ley di Laft, no mester tin problema. Mientras cu e tin contacto cu Caft, y a confirma cu diabierna, e lo reuni cu nan durante nan bishita na Aruba. “Y ora cu nan hacimi e pregunta, mi lo splica nan con leu nos ta cu e procedura aki,” Bermudez a bisa. Ora cu a puntra e mandatario, cuanto tempo e ta considera ‘relativo’ (manera cu e ley di Laft ta duna como ‘speling' si e no ta cla pa 15 di december), e no por a bisa, pero si cu e ta trata di un kalenderjaar, pues semper den cua luna cu e wordo aproba, e ta bay bek te na prome di januari di e aña ey. Esey ta loke e mandatario kiermen cu ‘forsa retroactivo’. Ta keda awor na Caft, pa wak si nan ta acepta e splicacion di Bermudez, of si nan ta para ariba, cu Aruba no a cumpli, y kico e consecuencianan di e tardansa ta e biaha aki, pa pais Aruba.