Cruz Cora ta AFl. 140.338 mas rico awor

SAN NICOLAS – Cu un donacion di AFl. 140.338, Valero Marketing & Supply Aruba N.V., a sa di alegra e dianan di fiesta di un fundacion masha stima den comunidad, Cruz Cora Aruba.Durante e conferencia di prensa, pa clausura otro campaña exitoso representante di Valero Marketing & Supply Aruba N.V., sra. Mariaine Croes, a hiba palabra. ‘Ora bo ta yuda, otro lo yuda bo! Cruz Cora Aruba ta yuda durante henter aña y na november pueblo di Aruba, a yuda Cruz Cora y yenando nan tanki di gasolin na stacionnan di Valero, pueblo a recauda AFl. 140.338 pa Cruz Cora’.Hans de Ruiter, tesorero di Cruz Cora Aruba, ta sumamente contento cu aña tras di aña, e fundacion ta ricibi sosten for di Valero Marketing y pueblo di Aruba. ‘Pa nos por keda yuda pueblo, nos mester pa pueblo yuda nos y esaki a pasa un biaha mas. E donacion aki, lo wordo bon usa den diferente proyectonan, cu lo beneficia nos comunidad’, Sr. de Ruiter a remarca. Valero Marketing y Rode Kruis, ta manda un danki masha grandi pa full comunidad di Aruba, pa e respaldo ricibi y ta desea pueblo henter Felis Dianan di Fiesta.