Parlamento por conoce un situacion abnormal otro siman

ORANJESTAD – Parlamento di Aruba por hay'e cu un situacion ‘abnormal’ otro siman diabierna, si huez dicta cu e retiro di e griffier Jacqueline Sherman, ta nulo. Unda cu e situacion ta bira abnormal, ta pasobra otro siman Parlamento ta nombra un griffier nobo, den persona di mr. Herman Hek. Si esey bira e caso, y huez dicta na fabor di Sherman (esta cu Sherman su retiro no tabata valido), Parlamento lo por tin dos griffier, cu lo bira algo unico. Mientras cu presidente di Parlamento, sra. Marisol Lopez Tromp, a confirma Hek su nombracion, e no kier a toca e asunto di e otro griffier, ni e posibel scenario cu por desaroya otro siman.

HEK TA E GRIFFIER NOBO

Loke si Lopez a confirma pues, ta cu mr.Herman Hek a sali como e persona mas cualifica di tur esnan cu a solicita pa e funcion. “Despues di e procedura cu a tuma lugar pa scoge un griffier nobo pa parlamento, tur tres fraccion den Staten a bay di acuerdo cu nos ta propone mr. Herman Hek como griffier di Staten,” Lopez a bisa NoticiaCla.com recientemente. “Esaki a keda trata den un comision central na parlamento (dos) siman pasa. Y e lo wordo benoemd pronto den un reunion publico di Staten,” Lopez a sigui bisa. Riba e situacion cu por surgi pues, e presidente no kier a duna su reaccion awor.

SITUACION ABNORMAL DEN PARLAMENTO

Den caso di Sherman, su abogado David Kock a mustra cu e hecho, cu ta nombra un griffier nobo, siendo cu su cliente ta netamente den corte pa haya su trabou bek, no mester tin influencia. “Staten ta na altura, cu e caso di sra. Sherman ta wordo bringa den corte, y e veredicto ta gescheduled pa dia 18 di december, cu ta toevallig otro siman,” Kock a cuminsa bisa. “E demanda tabata pa nulifica e retiro di sra. Sherman. Si esey sosode y Staten - no obstante sabiendo cu e caso ta andando - nombra un otro griffier, mi ta kere cu bo ta bay tin un situacion hopi abnormal den nos historia (parlamentario),” Kock a bisa. Esaki pasobra segun e abogado, semper ta 1 griffier so tabatin nombra door di un procedura specifico. “Si bo nulifica e retiro di Sherman, kiermen cu ta e ta keda e griffier y segun ley, bo no por tin dos griffier,” Kock a bisa. Como tal, segun e abogado, e lo bira un problema di Staten.

BRINGA LARGO DEN PARLAMENTO

Un cos ta sigur segun Kock, cu ningun di dos partido lo sinta keto y laga esaki bay sin mas. Esey ta nifica, segun Kock, cu e por bisa caba, cu ken cu gana e caso, e contra partido lo bringa esaki te na final y lo no laga esaki keda sinta sin mas. Por tin tambe e situacion, manera cu Kock mes ta splica, cu huez por dicidi cu, mirando e situacion, por nulifica e decision di retiro di e griffier anterior, y bay mas den un direccion di un compensacion financiero, aunke esey no tabata e caso. E caso tabata netamente uno, pa nulifica e retiro, y no pa compensacion financiero. Kico cu pasa, e caso otro siman lo no ta esun final, y por lo pronto e caso aki, lo sigui pa largo, te ora cu partidonan frustra tur posibel caminda legal pa logra nan meta. Foto cortesia www.arubaariba.com