Mientras no a trata presupuesto 2016 ainda, CAFT ta bin papia diabierna

ORANJESTAD – College Aruba Financieel Toezicht (Caft), lo ta na Aruba awor, unda cu nan lo reuni cu entre otro Minister di Finanza, y e comision financiero permanente di Parlamento. E colegio financiero, ta biahando den region y recientemente a topa cu e gobierno nobo di St Maarten (lesa e relato di e biahe aki), unda cu nan a atende e gobierno riba nan responsabilidad financiero.

REUNION DIABIERNA

Pa loke ta Aruba, e lo bira un bishita interesante, mirando cu te ainda, e presupuesto 2016, no a keda entrega na Parlamento, te pa e wordo trata. Manera ta conoci, segun e ley Aft di augustus ultimo, gobierno di Aruba mester pasa e presupuesto, prome cu fin di e aña anterior (december) y presenta esaki na Caft, mas tarda 15 di december, of un termino despues cu ta ‘rasonabel’. Kico e tempo ey ta, no ta conoci. Si gobierno di Aruba no cumpli, Caft por duna un conseho na gobierno di Reino, pa tuma medida contra Aruba. Mas probable, esaki lo por bira un instruccion (aanwijzing), contra Aruba, pa fors’e keda cla ainda cu e presupuesto.

SITUACION DI PRESUPUESTO 2016

Den combersacion cu presidente di Parlamento, sra. Marisol Lopez, cu a bisa NoticiaCla.com, cu te cu awe, e presupuesto 2016 no a drenta ainda. Pero mas importante, ta e presupuesto supletorio 2015, unda cu gobierno tin cu demostra cuanto realmente a gasta di e presupuesto, y cuanto a surpasa esaki, si e ta e caso tambe. Ningun di dos presupuestonan a yega. Por a sinti, cu tin mas pura, y urgencia pa e presupuesto supletorio keda trata prome. Mientras cu tin tur indicacion, cu e presupuesto 2016, lo wordo trata e prome siman di januari 2016, esun supletorio, si mester pasa ainda, prome cu e fin di e aña aki.

PRESUPUESTO CU FORZA RETROACTIVO

A puntra e presidente di Parlamento, riba e declaracion di Minister di Finanza mr. Angel Bermudez, cu a declara cu mas probable lo trata e presupuesto 2016, den e prome siman di 2016, y lo e drenta na vigor cu forza retroactivo. Riba esaki e hefe di Parlamento a bisa, cu mester check cu Bermudez, ya cu ta el a declara esey. E no por a bisa, unda e presupuesto ta aworaki, y a sugeri pa check esey cu gobierno mes.