Discusion politico atrobe riba asunto di seguro

ORANJESTAD - E corespondencia recien (serie di pregunta y contesta entre parlamentarionan Hulandes y Minister Hulandes Plasterk) riba e cuestion di seguro pa studiante Arubianonan na Hulanda, y cu a desemboca den articulonan den prensa Hulandes e siman aki (awe atrobe), cu a bolbe lanta stof politico na Aruba entre politiconan. E conclusion di e corespondencia mientrastanto ta, cu mientras cu gobierno Hulandes ta na altura di e caso, nan no ta haya necesario pa intermedia den e caso aki. Esey no ta kita afo, cu tin cierto duda den con cierto cosnan a desaroya. Asina cierto medionan Hulandes a interpreta e caso, manera cu e.o. tin duda riba cierto forma di integridad, cu cual a traha e caso aki.

REACCION DI MINISTER

Minister di Enseñansa sra. Michelle Hooyboer, den un reaccion pa NoticiaCla.com ta mustra atrobe, cu esaki ta “un asunto fabrica door di MEP y cu lamentablemente a haya rabo te na Hulanda, door di "lobbying" haci door di lider di partido MEP, Sra. Evelyn Wever-Croes, (y) a crea interes di un parlamentario di Tweede Kamer, na Hulanda. Esaki a resulta den preguntanan haci na Minister Ronald Plasterk.”

ASUNTO HOPI SIMPEL

E mandatario ta sigui mustra cu “e asunto di seguro di studiante na Hulanda ta uno hopi simpel. (Esta cu) despues di mas cu 20 aña di monopolio, e seguro di studiantenan a wordo habri, door di un destaho publico, resultando den un reduccion den e gastonan di seguro substancial. Esaki no a cai na agrado di esnan liga na MEP, y a conduci su mes den un storia fabrica door di oponente politico pa defama mi persona. Tur documentacion, relaciona cu e destaho publico a wordo manda pa Sra. Evelyn Wever-Croes na april di 2015, y te dia di awe, 8 luna despues, ni un pregunta mas a wordo haci, ni tampoco otro pasonan menasa door di dje."

REACCION DI EVELYN WEVER

NoticiaCla.com a puntra, e lider di fraccion di MEP, mr. Evelyn Wever riba esaki,“Mi a hasi’e pregunta por escrito y el a contesta. Ma kere cu el a contesta mi e berdad. Despues a bin e caso den Corte y den e veredicto a sali hopi cos, cu tabata diferente cu locual el a contesta mi por escrito. Dia di e veredicto, mi a cuestion’e riba e veredicto durante un reunion publico den parlamento. Ma mustr'e cu un hues imparcial a dicta, cu su actonan tabata cuestionabel y cu e ta perhudica nos studiantenan. Algo cu por cierto Arubahuis a confirma mi,” Wever a bisa.

WEVER RIBA E CASO Y E COMPANIA

Segun Wever, e compania cu a gana e 'bid' tabata nobo nobo, e tabata tin 1 euro di capital, e no tabatin trahado. Ni un number di telefon fiho (celular so) y pa colmo, cu e doñonan di e compania tabata tin "nauwe banden", cu e casa di Minister Hooyboer.” M'a cuestiona e minister riba tur esaki y su contesta tabata cu e lo apela e caso. Pues m'a warda e apelacion keriendo cu e minister no ta gaña. Y kico mi tin cu constata? Cu el a bolbe gaña pasobra e no a apela!! Pues e minister awor ta acepta e veredicto di hues y ta acepta cu el a actua cuestionabel. Ministerio Publico mester haci un investigacion y Parlamento tambe mester investiga si por tin confiansa den e minister aki," Wever a sigui bisa.

REACCION DI E MANDATARIO

Mientrastanto Hooyboer, reaccionando tambe riba e contenido di e articulonan Hulandes, ta mustra cu e veredicto cu keto bai ta keda menciona, ta un caso sumario, contra e corant Solo di Pueblo, pa rectificacion di e mentiranan publica. “ Un hues no a reconoce e peticion, di cual nos no ta di acuerdo cu ne. Esaki ta un risico ora di hiba cualkier asunto corte, no ta tur ora un hues ta considera e argumentacion den Prome Instante,” e mandatario a bisa.

LIGA NA E COMPANIA OF NO

Riba e punto di si e mandatario ta liga na e compania of no, of su casa, tambe e tabatin reaccion. “Hecho ta keda cu ni mi persona, ni ningun famia di mi ta liga na ningun manera na e compania cu a gana e 'bid'. Pero esey, no por wordo bisa di e lider di oposicion y e compania anterior. E contesta di Minister Plasterk, ta splica hopi cla, cu cualkier asunto di destaho publico ta uno interno, y cualkier pregunta over di esaki, mester wordo trata na Aruba mes, manera den e caso aki, a haci door di manda tur documentacion pa e Parlamentario, cu tabata tin pregunta di dje por medio di Parlamento di Aruba,” e mandatario a finalisa bisando.