SETAR celebrando 20 aña di internet

ORANJESTAD - Den luna di december, SETAR ta celebra, cu 20 aña pasa, Aruba a cera conoci cu Internet pa promer biaha. Internet, cu ta e tecnologia mas sofistica di nos tempo, a causa un revolucion historico den comunicacion, na Aruba y mundo henter. Y te cu awe, ainda ta evolucionando.

20 AÑA

E logro aki, cu a sosode na Aruba 20 aña pasa, ta despues di e trabou grandi, di un grupo di tecnico di SETAR, cu incasablemente a traha pa esaki. Na december 1995, e servicio di Internet a cuminsa na Aruba, via e sistema di 'dial-up', bou di e nomber di Setarnet. Esaki tawata tin un speed di 14.4 Kbps. Den transcurso di añanan, SETAR a keda amplia e servicio constantemente, pa asina cumpli cu e standard mundial y e demanda di nos hendenan.

AUMENTO SPEED CABLENET

Awe cu hopi orguyo SETAR, pionero di Internet na Aruba, ta anuncia, cu tur cliente di Cablenet, lo ricibi entrante 9 di december 2015, 100 Mbps download y 10 Mbps upload, pa asina por disfruta mas di e mundo di Internet, cu tin un infinito di inovacion.