The Mill: Incidentenan na Olde Molen club ta daña reputacion di e hotel

ORANJESTAD – E incidente cu e laga un bouncer di e club nocturno Olde Molen morto, y un otro herida, a pone cu e hotel cerca di e club, esta The Mill Resort reacciona y - entre su comentarionan - ta distancia (un biaha mas)  su mes di e club nocturno. Mes momento conocido abogado mr.Chris Lejuez, actuando aki como consehero legal pa e club, a reacciona, entre otro den matutino Diario awe, riba e incidente. Dos establecimento pues, cu ta ubica banda di otro, papiando riba e mesun asunto, di nan respectivo angulo y pensamento.

HOTEL TA DISTANCIA SU MES DI E CLUB

E hotel, den un intento pa clarifica su asociacion - of mejor dicho no asociacion - , a splica via un comunicado, cu ‘De Olde Molen ‘ nightclub no tin ningun relaciona, sea comercial of otro tipo, cu The Mill Resort & Suites, " y cu nan (e club) ta opera bou di un permiso separa di restaurant y alcohol, otorga mas di 40 aña pasa na The Olde Molen NV." Ademas e compania hotelero ta sigura, cu e no ta asocia cu e club, y ta un entidad separa di e hotel. A probecha mesora di manda palabra di condolencia na e famianan di e fayecido.

AUTORIDAD COMPETENTE MESTER TUMA ACCION

E hotel a bay mas lew, usando e oportunidad aki pa pidi autoridad competente, pa ‘tuma e accion corecto', como cu esaki ta e ultimo incidente, di un serie di problema, cu e hotel, su huespednan, trahadonan y contratistanan mester a soporta. Y ta splica cu esaki ta sosode a base semanal. “E ta creando un molester inaceptabel pa e hotel, y nos huespednan. E ta dañando e bon nomber y reputacion di no solamente nos hotel, sino di Aruba tambe, como un destinacion sigur pa vacacion."

REACCION OLDE MOLEN

Pa loke ta e consehero legal mr.Chris Lejuez, el a duna su reaccion na e matutino diario, esta e version di parti di e doñonan di e club. Segun Lejuez, ta yuda e bouncernan di e club (cu a cera caba e ora ey) a bay yuda algun turista, cu tabata den problema, ora cu nan a haya nan mes den e incidente lamentable. Pero cu tur cos a sosode pafo di e club, riba un distancia relativo. A lamenta e hecho, cu un persona a fayece den e incidente aki, y aki tambe a manda palabra di condolencia pa e famia di e fayecido, y forza pa esun herida. Ademas, Lejuez ta mustra, cu enberdad tin occasion unda cu a haya hende, cu arma den e lugar, y cu a tuma pasonan pa remedia esaki.