Bouncer herida pa tiro, a wordo poni riba mashin

ORANJESTAD – Dos dia despues cu e la wordo alcansa y seriamente herida pa bala di pistol, e homber Freddy “Pequeño” Montes a wordo poni riba mashin, pa e hala rosea. Su situacion ta sigui hopi critico segun fuentenan di NoticiaCla.com awe mainta. Tabata diamars cu a opta pa pone riba mashin, ya cu practicamente e no por hala rosea riba su mes, debi na e complicacion. Aparte di esey, su situacion ta sigui pues mes critico y ainda e ta bringando pa su bida.

BRINGANDO FOR DI DIALUNA

E bouncer, cu a keda herida, dialuna marduga na e club nocturno Olde Molen, for di e momento ey, ta bringando pa su bida . Fuentenan cerca di su famia, a confirma na NoticiaCla.com for di dialuna anochi, cu Montes, su situacion no tabata mucho bon, y cu tabata teme pa su bida, debi na e heridanan cu el a sostene. Mes momento, amigonan tabata poco incomodo con e caso ta desaroyando. Esaki pasobra nan no tabata tendiendo nada riba e caso, siendo cu hopi di nan tin informacion, manera testigonan ocular cu a wak tur cos sosode, y cu conoce e persona, cu a los e tironan cu a herida Montes, y cu a resulta fatal pa e colega bouncer Bongo, cu a fayece dialuna marduga.

E CASO DI DIALUNA MARDUGA

Tabata 4:40 dialuna madruga, cu e melding a drenta, di e caso di bringamento cu tiro na de Olde Molen, cu a laga un persona morto y otro seriamente herida. Ora cu dos bouncer di e club nocturno, na e club a bai intermedia, a cuminsa un bringamento, unda un di e bouncernan a keda mortalmente herida. Informacion cu Noticiacla.com a haya e momento ey, tabata cu el a fayece na hospital, mientras e otro ta herida, y tambe a wordo transporta pa hospital. Vocero di polis Lito Lacle a confirma, cu e bouncer cu a fayece, ta Damian Aldwayne C.A., miho conoci como 'Bongo', naci dia 26 di october di 1978. Dokter Reeberg a constata morto 4.58 am.