Arubiano Leomar Angela nombra como Abogado General na Corsou

WILLEMSTAD – Siman pasa conseho di minister di Reino, a nombra Mario (Leomar) Angela (49) como e proximo Abogado General di pais Corsou. Loke ta haci e nombracion aki special, ta cu Angela ta un arubiano. Riba conseho di Minister hulandes di Husticia van der Steur, Angela a wordo nombra. Su nombracion ta drenta na vigor 1 di januari 2016.

TRAYECTORIA

Angela, cu awe ta cumpli 49 aña, a nace na Aruba, y cuminsa su trayecto RAIO (trayecto pa bira huez y fiscal) na Aruba den añanan 90. El a sigui esaki na Corsou, na unda cu el a keda biba tambe. Na Aruba, el a sigui Universidad di Aruba y a bay Colegio tambe. Prome cu esey el a sigui scol na Colegio Sagrado Curazon na Savaneta. Durante su carera legal na Corsou, el a haci casonan grandi y 'high profile'. Actualmente Angela ta fiscal y mes momento e Abogado General suplente. Un nota special ta cu su ruman muher, ta vocero di Ministerio Publico aki na Aruba, esta Ann Angela. Aruba pues, por ta orguyoso di tin un yiu di tera, den un funcion halto den Ministerio Publico na Corsou. Foto cortesia Mariano Heyden.