Tres huiszoeking pa busca ‘Yellowman’ no a produci nada

ORANJESTAD – Tres huiszoeking awe mainta, pariba di brug (Savaneta), no a conduci na nada concreto. Vocero di Ministerio Publico, Ann Angela, a confirma awe tardi pa NoticiaCla.com, cu e huiszoekingnan aki tabata en coneccion cu e buskeda pa e fugitivo di polis, Milanchelo Trinidad, alias “Yellowman”, cu polis ta kere, ta responsabel pa morto di Aldwayne Damian dialuna marduga. Segun polis a confirma awe merdi na NoticiaCla.com, nan ta buscando "Yellowman", pa e morto di Damian, y pa a herida e otro victima, Freddy Montes, cu ainda ta bringando pa su bida.

RESULTADO DI REDADA

Segun Angela, durante e huiszoekingen na tres diferente lugar, no a haya nada. “Nada di droga, arma. Nada”, Angela a bisa. Y tampoco ni holor di e sospechoso. E buskeda mientrastanto ta continua, unda cu polis a pidi pa tur hende tene un bista riba e persona peligroso aki. Segun informacion di polis, e ta naci na Boneiro dia 7 di mei 1985 y ta biba na Cayenastraat # 20, na Aruba. Ta acusa e sospechoso aki di e viola articulo 2:262 c.q. 2:259, di e “Wetboek van Strafrecht van Aruba” y articulo 3 di e “Vuurwapenverordening”. Polis ta pidi comunidad, cualkier persona cu por sa algo di su paradero, pa informa polis mesora, yamando number # 100 of via tipline 11141. Ta considera e homber aki como peligroso y cu chens grandi cu e ta arma.