Docternan di cas no ta firma pa 'AO' mas

Posted on 7/29/2014, 5:14 PM AST | Updated on 7/29/2014, 5:14 PM AST

ORANJESTAD – Docternan di cas, -miembro di Huis Artsen Vereninging Aruba (HAVA)-, entrante diabierna awor 1 di Augustus no ta firma carta di AO (Arbeids Ongeschikt) mas. (lesa e participacion di HAVA aki ) Entrante e fecha aki, trahadonan cu mester meld AO, tin cu acudi na un instancia priva cu ta prove e servicio aki. E practica di firma carta di AO ta wordo considera pa HAVA como un estorbo pa e docternan di cas y como tal a opta pa no haci esaki mas. Mes momento e cambio aki ta percura tambe pa un miho control enves di un ‘onderonsje’ entre e docter di cas y su pashent cu e conoce caba.

Den pasado caba, e discusion aki tabata riba mesa pero nunca a logra yega na un acuerdo entre HAVA y e minister di Salud. E practica di firma carta di AO rond mundo, por lo menos segun HAVA, ta wordo desconseha rond mundo. E pensamento tambe di HAVA ta cu un docter di cas no por duna un conseho riba un pashent propio (cada docter di cas tin un lista di pashent cu e ta trata), si e ta apto pa traha of no. “Esey por solamente door di un docter independiente”, e carta di HAVA ta sigui bisa. De hecho un docter di cas por haci su analisis independiente y obhetivo, y si ta necesario, pidi informacion adicional serca e docter di cas.

Durante e ultimo reunion di HAVA, a vota unanimamente pa e implementacion di e regla nobo aki tuma lugar, y a prik e fecha di 1 di Augustus pa cuminsa. Un decision cu a tuma for di luna di mei caba. E ta valido solamente sinembargo pa docternan di cas cu ta miembro di HAVA. NoticiaCla a compronde cu tin docternan di cas cu no ta miembro y cu riba nan mes por dicidi cu nan no ta haci esaki y si ta sigui duna carta di AO pa nan pashentnan.

Companianan priva cu ta specialisa den e servicio ‘nobo’ aki ta entre otro Medwork, cu desde 2009 ta ofreciendo e servicio aki. Un di su directornan Ru Croes, ta sigura cu e ta un win win situation pa tanto e docter como e compania ya cu e ta posee un miho control y tambe ta baha gasto pa AZV cu ya caba tin problema financiero.

Croes ta admiti cu e ta nifica tambe cu entrante 1 di augustus, e companianan priva aki lo haya un ‘boom’ diripiente di cliente, pero mes momento e ta mehora e servicio di pashent/dokter y ta kita un dolor di cabes pa e compania unda cu e trahado ta emplea. Tur compania inscribi serca e compania aki, Medwork, ta paga un suma fiho pa cada trahado, y esey ta ensera e control medico ora cu un pashent meld ziek. E suma ta varia entre 17 pa 19 florin, cu ta ensera si henter un pakete pa e luna.