Rafini: Problema di ‘swipe dollar’ pa venezolano a stop

ORANJESTAD – No tin problema mas di raspamento di dollar den tienda. Presidente di Asociacion di Bankero Pierre Rafini, a confirma esey na NoticiaCla.com dialuna. “Esey tabata algo cu a disminui masha hopi mes,” Rafini a bisa. Loke e kier men, e ta bisa, ta cu clientenan cu tabata complice pa yuda venezolanonan yega na dollar. Despues Rafini ta clarifica y splica cu e asunto a para completo. “Esey no tin mas. Esey a stop completamente,” Rafini ta sigura NoticiaCla.com. E ta haci mencion di banconan manera RBC, CMB, Banco di Caribe, Aruba Bank, y cu no a tende nada negativo mas di esaki.

ALARMA A FUNCIONA

Segun Rafini, nan como banco, no ta mira ningun cliente mas cu ta bin banco practicamente tur dia pa lanta dollars. “Vooral no si un of dos dia prome nan a swipe un cantidad grandi di dollars y nan ta bin busca full e suma.” Segun Rafini, tur e banconan no tin e problema ey mas, y ta confirma cu ‘e alarma a funciona’. E alarma, unda cu a bin afo den NoticiaCla.com algun luna pasa y mustra con serio e problema tabata y cuanto cliente (comerciante) a perde nan mashin di swipe pa motibo di practica illegal. Loke a cambia awor, ta e manera con hende ta purba yega na nan dollar awor. Awor nan ta haci nan mes disponibel, pa paga pa comestibel di otro hende (cu ta drenta e tienda pa cumpra)”, Rafini a bisa. E venezolanonan awor, mirando cu e arubianonan no tin e dollar pa duna nan bek, nan ta dispuesto pa te hasta acepta florin, y e ora nan ta bay casino pa cambia esaki na dollar. Aunke cu segun Rafini, casino no ta cambi’e pa dollar sin mas, e venezolanonan ta cumpra ficha cu e placa y hunga un of dos wega y despues 'cash out' na dollar.

CON E OPERACION TABATA FUNCIONA

E forma con e operacion tabata funciona, tabata cu e venezolano ta bin na un tienda, bisa e doño di tienda pa e swipe 1000 dollar, y dun’e bek 800. E comerciante na su turno tabata bin banco na gran cantidad e dia siguiente, pa lanta placa cash na dollar y duna e hendenan. “Esey no tin mas”, Rafini a bisa.

MASHINAN BLOKIA

Ora cu e problema a aumenta algun tempo pasa, banconan a cuminsa tuma medida drastico, door di sea blokea e mashin di swipe, of den cierto caso pa clientenan cu a haya varios advertencia, a te hasta bay cu e machine completo. Esnan blokea tabata pendiente investigacion. Esnan cu a perde e mashin, ta nifica cu nan no ta haya e mashin bek. Esnan na unda cu por a conclui cu a siña nan les, a kita e blokeo di e mashin.

PAKICO A LOGRA PARA E PRACTICA

Loke segun Rafini tabata e parti determinante, pa para e practica, tabata cu clientenan no por a traha a base di cash so. Hendenan a stop di cana cu placa cash, pa motibo di seguridad. Un comerciante si e no tin un punto di benta, esta un mashin di swipe, ta forza e cliente pa bay swipe otro caminda, cu e risico cu e cliente no ta bin bek mas. E cliente lo a haya un otro sitio na caminda cu nan mester a bay swipe. “Bo ta pone bo mes den un situacion no competitivo compara cu e mercado y competidornan directo, cu ta haci cu nan ta pone nan situacion straight y traha drechi,” Rafini a bisa.