RBC Bank a introduci e producto EZ Pay na Aruba

ORANJESTAD – E producto hopi practico pa comerciantenan chikito (y grandi) conoci como EZ Pay, a keda introduci dialuna pa RBC Bank. E tabata pendiente pa un tempo, pero porfin ta obtenibel y ya caba hopi solicita pa e comunidad comercial. E concepto di EZ pay, ta basicamente un forma practico pa un comerciante colecta placa di un cliente, uzando su smartphone (di e comerciante), un aparato chikito pa e tarheta di credito, y nada mas. Segun director di RBC na Aruba, Pierre Rafini a splica NoticiaCla.com, EZ Pay ta perfecto pa comerciantenan chikito manera un taxista, un trainer of otro tipo di persona cu no tin un oficina fiho, pero cu tin cu haci transaccion financiero si cu su clientenan.

APLICACION INNOVATIVO

Segun Rafini, e ta e forma (awor) mas inovativo, cu a haya un bon aceptacion mesora. “E ta pa esnan ‘on the go’." Ora cu un comerciante kier haci un transaccion, e ta djis uza su smartphone, riba cual tin un app(licacion) ariba, y ta uza esey pa hinca e informacion di e transaccion. Hunto cu ne, tin un aparato chikito, den cual e cliente ta pone su credit card. Riba e telefon mes, e cliente por firma cu su dede, y e aparato ta manda un confirmacion pa e telefon di e cliente. E cliente por pidi pa un confirmacion via sms of su email.

'PAPERLESS'

Rafini ta mustra cu e facilidad ta cu e ta ‘paperless’, pues sin papel, y ta traha hopi lihe, y te hasta den lugarnan remoto, cu normalmente no tin coriente of acceso pa un transaccion normal. Te hasta ora cu p.e. coriente bay, e transaccion por tuma lugar, mirando cu no mester di coriente, sino solamente un smartphone cu ta carga, y e blue tooth connection y data, cu ta conecta e smartphone cu e 'device' den cual mester ubica e tarheta di credito. Pa Rafini, e ta mira cu esaki lo funciona bon cu hendenan cu ta move hopi, y cu tin cu cobra cliente, cu hopi biaha no ta cana cu placa cash, pero si tin tarheta di credito. E ta un facilidad pa esnan cu tin tarheta di credito, y den e proximo fase, lo uza tarheta di debito tambe.

CONOCI OTRO PARTI CABA

Mientras cu pa Aruba e ta algo nobo, e ta conoci caba na Canada su banconan di RBC y algun otro islanan den Caribe. Pa aworaki e unico cu tine ta RBC, aunke no ta descarta cu den futuro otro banconan por bin cu algo asina tambe. “Den nos caso, nos ta e prome cu tin'e. E ta bay duna un alivio na hopi comerciante den e caso aki, pa acesora su clientenan”.

CAMPAÑA SPECIAL

For di dialuna, hendenan por a cuminsa usele y aplica p'e. Tin un campaña entre awe cu 7 di maart, unda cu e prome 20 hendenan, ta haya e aparato (e 'device' den cual tin cu pone e credit card) gratis pa usele. Nan mester ta cliente di RBC. Esaki ta pasobra e ta conecta riba bo cuenta di banco na RBC. “Ora bo swipe, e cuenta ta wordo credita di biaha”.