Consul Colombiano: Lo conoce aumento notable di colombiano pa Aruba

ORANJESTAD – Colombianonan, tanto na Colombia como na Aruba, ta hopi feliz y complaci cu e cambio di maneho di visa, manera introduci siman pasa. Asina consul di Colombia na Aruba, Mirza Gnecco a sigura NoticiaCla.com. For di dia 3 di december, Colombianonan no mester di visa mas pa drenta Aruba. “Como tal e ta bira mas facil pa famianan Colombiano, cu ta biba riba e isla, comparti di un forma mas cerca cu nan familiarnan na Colombia,” Gnecco a sigui bisa. E visa a wordo elimina despues di 12 aña di ta den operacion.

CAMBIO BENEFICIOSO

E cambio aki lo tin hopi beneficio pa Aruba segun Gnecco. Entre nan, cu hopi ciudadano Colombiano cu kier bin Aruba awor y conoce e isla y pasa nan vacantie aki, por haci esaki mucho mas facil. Ela sinti e cambio caba di sentimento, y e gana di e colombiano di bin Aruba, sea cu mas frecuencia, of simplemente pa prome biaha. De hecho, Gnecco ta compara e situacion cu e islanan Corsou y St Maarten, cu mas prome caba, a conoce e cambio aki algun luna pasa. Den e caso ey tambe, a elimina e visa pa colombianonan pa e respectivo islanan ey. “Eynan tabatin un incremento notable di bishitante Colombiano for di 1 di juli ultimo,” e consul a bisa. Algo cu segun e, tambe lo sosode na Aruba.

INTERES DI COLOMBIANONAN

Hopi, tabata e preguntanan di e paisanonan nacional Colombiano na Aruba, haciendo e pregunta, con lo a implementa e medida nobo aki, pasobra nan lo kier a trece nan familiarnan. “E interes ta hopi grandi, y notable den nos oficinanan (na Aruba).” Esey ta nifica cu no solamente turista Colombianan lo kier bishita Aruba, sino cu tin un interes grandi tambe di nativos, (indigenas) cu kier unifica cu nan famia. “Claro, e tramite pa Colombia pa bin Aruba tabata centralisa na Bogota, pesey tabata dificil pa nan bin. Nan no tabatin e posibilidad pa saca e visa pa bin Aruba, of e tabata keda hopi dificultoso y/of hopi costoso. Pues awor si hopi familiarnan lo por biaha mas facil.”

PROME CU VISA Y DESPUES SIN VISA

Pa pone e proceso di antes y awor den un contexto pa por compronde, e consul a splica cu, antes pa un persona di e departamento atlantico (na Colombia) kier bin Aruba, e mester a traslada pa Bogota pa solicita pa su visa. Esey tabata nifica cumpra pasashi, busca hotel, etc. Pues gastonan extra. “E tabata un asunto bastante compleho y caro,” segun Gnecco. Awe esey a bira mucho mas facil. E habitante di Barranquilla cu kier bin Aruba, tin cu simplemente cumpra su pasashi di ida y buelta, tin un reserva hotelero, of un invitacion di un persona di Aruba, demostra cu e tin forsa financiero y e ta cla. Nada mas.

COLONIA COLOMBIANO NA ARUBA

Y mester tene cuenta, cu na Aruba e cantidad di Colombiano registra legalmente, ta casi 15.000. Pues nan lo tin familiarnan cu lo kier y por biaha awor, pa bin bishita nan famia na Aruba, y visa versa. Como tal, e trafico familiar ta bay bira mucho mas frecuente y cu e consecuencia financiero, posiblemente beneficioso pa Aruba. Manera cu a splica anteriormente, a nota un aumento notable ora cu a elimina visa pa Colombianonan na St Maarten y Corsou. Algo cu awor, lo sosode na Aruba tambe.