1600 caso sopechoso di dengue y chikunguya registra na Aruba den 2015

ORANJESTAD – Aña 2014 y 2015 ta casi igual pa loke ta trata casonan di Dengue y Chikungunya, cu a wordo raporta pa dokternan di cas of un di e laboratorionan. Den e aña aki a registra 1600 caso sospecho di Dengue y Chikungunya. Di e 1600 casonan 13% (aproximadamente 200 persona) a sali positivo pa e virus di Dengue y 29 % (aproximadamente 500 persona) a sali positivo pa e virus di Chikungunya. E ultimo virus aki a lanta cabes na Aruba fin di 2014.

EUGENE MADURO

Tabata Eugene Maduro, di e seccion Epidemiologia y Investigacion, cu a duna e ultimo cifranan di e periodo actual, pa cu e dos virusnan cu ta presente na Aruba, esta Dengue y Chikungunya. Ambos virus ta wordo transmiti pa e sangura Aedes aegypti (sangura pata preto cu blanco) presente na Aruba.

SINTOMA

Sintoma manera keintura halto compaña cu e.o. dolor di cabes, dolor di curpa of joints, dolor di wowo y rash, por ta indicacion cu un persona por ta infecta cu e virus di Dengue of Chikungunya. Si bo ta sintibo malo cu e sintomanan aki, ta sugeri pa bo bishita bo dokter di cas. Bo dokter di cas lo dicidi si e ta manda bo bay haci test di laboratorio, si e ta sospecha cu bo por ta infecta cu un di e virusnan aki.

BARIONAN MAS AFECTA

E barionan unda cu a registra mas caso di notificacion (no di confirmacion) ta San Nicolas, Savaneta, Pos Chikito, Noord, Oranjestad Oost y Oranjestad West. Ta pensa cu e cantidad halto den e areanan mas pobla, ta pa motibo cu hopi hende ta biba cerca di otro, e ruta pa transmision di e virus entre un persona infecta pa un otro persona, via e sangura, ta mas cortico. Den e casonan notifica, tabatin mas hende muhe cu hende homber cu a wordo sospecha cu e virus di Dengue of Chikungunya. E grupo di edad mas afecta, tabata e grupo di adulto di edad productivo, esta entre 25 y 64 aña di edad. Concluyendo, tur hende mester keda alerta pa cu criadero di sangura sea na cas, vecindario of na pia di trabou. Sin sangura no tin Dengue ni Chikungunya.