Minister de Meza bek pa Merca awe pa papia cu Citgo

ORANJESTAD – Minister di Utilidad Mike de Meza, a biaha pa Merca awe cu un delegacion, pa reuni atrobe cu oficialnan di Citgo, riba e ultimo informacion cu a keda ricibi siman pasa. Mientras cu e agenda exacto no ta conoci, fuentenan di NoticiaCla.com a confirma, cu ta continuacion di e negoshacion pa cu un posibel reapertura di e refineria. E delegacion di Aruba ta bolbe Aruba diaranson awor.

CITGO A DUNA LUZ BERDE

Manera ta conoci, un siman prome cu e fin di november, e compania mericano a compromete nan mes, pa un continuacion di exploracion pa posibilidad pa un reapertura di e refineria. Esaki kier men cu nan ta continua cu fase 2, cu lo termina fin di december, pa despues dicidi si finalmente nan ta tuma e rienda di e refineria. E prome fase mester a termina fin di november, unda cu e compania mester a duna gobierno di Aruba, un tipo di status, y a base di esey, dicidi si ta continua pa e di dos fase. Durante e prome fase, a haci initialmente e asina yama ‘due diligence’, unda cu a e.o. inspecciona e facilidad, reuni cu esnan di e compania, y asina pone nan mes na altura. Durante e fase aki, nan a keda impresiona cu e facilidad, y a opta pa duna luz berde pa continua.

E PROCESO CU CITGO

Citgo ta e ultimo compania cu a mustra interes serio, pa bira e posibel doño nobo di e refineria, despues cu un cantidad di otro intento cu otro companianan no a materialisa. E negosacionan aki a bay asina leu, cu na september ultimo, Citgo y gobierno a firma un MOU, cu ta stipula e siguiente proceso durante cual a palabra e tres siguiente fase di exploracion. Gobierno, den e caso aki ta cautelosamente optimista, ya cu tin mucho variable ainda, cu por cambia e panorama aki. E intencion ta si, pa prome cu aña bolter, tin un decision cu si Citgo ta bira e doño di e refineria, of por lo menos nan ta esun cu lo bay negosha cu Valero, pa yega na acuerdo, pa bira e proximo cumprado di e refineria.