Alfredo Capelo ta kibra silencio riba su caso na Colegio Arubano

ORANJESTAD – Conocido docente di Colegio Arubano Alfredo Capelo, a kibra su silencio riba e caso(nan) cu e lo ta envolvi aden y ta wordo acusa di dje. NoticiaCla.com a pone man riba un declaracion amplio di e docente, unda cu e ta splica detayadamente kico tur a sosode. Y aki e ta desmenti tambe di loke e ta wordo acusa di dje. “Mi ta uza e medio aki pa mi declara un bez, cu ami hamas a menasa sr. Timmermans cu morto, ni personalmente, ni por escrito, y cu ta tende e a tende mi expresion di otro hende, cu a tende,” Capelo ta bisa. E ta bay basta den detaye, splicando tur cos den un documento di 6 pagina.

MENASA DI MORTO

Riba e caso di menasa di morto, Capelo ta mustra cu “e mas tristo ta cu si e (rector Timmermans) a haci un investigacion mas profundo riba e articulo den ley over di “amenaza”, locual mi a bisa via un tercer partido, e lo a haya sa cu esey no ta suficiente pa concretisa e supuesto keho cu el a haci contra mi persona." Segun Capelo, e rector a logra un cos sigur: “ Sr. Timmermans a logra ta cu ami ta pafor di Colegio y mi nomber a wordo atacha."

TREK COS RECHT

Segun Capelo, e tabata willing, a pesar cu e no ta di acuerdo cu nan carta, di cumpli cu kico rectorado a pidi'e. “Pero mirando con e rector Timmermans, a trece e asunto aki cerca mi coleganan, e alumnonan y e mayornan, dunando informacion incorecto, mi mester ‘trek e cos aki recht’ !”

TIMMERMANS RECONSIDERA

“Mi ta spera cu meneer Timmermans por reconsidera su acusacionnan y manera hende grandi, por yega na un solucion na unda mi persona, cu amor pa e scol na unda m'a traha pa 35 aña, por subi tereno di scol, pa cuminda mi coleganan y sigur e alumnonan,” Capelo a bisa. “Sr. Timmermans por ta sigur cu ami kier y semper tabata kier, paz y seguridad na Colegio." M'a haci y ta haciendo y lo keda haci todo por todo, pa e muchanan no bai over na ningun accion, cu lo por pertuba e paz cu nos tur kier," Capelo ta finalisa bisando. (lesa e declaracion completo di Alfredo Capelo aki)