Comision parkeermeter ainda no a haya reaccion di minister Oduber

ORANJESTAD – E comision di parkeermeter, no a haya un reaccion ainda di Minister di Turismo Otmar Oduber, riba nan carta riba e topico di parkeermeter. Asina un di e firmantenan, comerciante John Chemaly Jr, a confirma na NoticiaCla.com den fin di siman. E deadline tabata poni pa 3 di december ultimo, pa e mandatario duna e comision un contesta. Algo cu nan no a haya ainda.

PAKICO DEADLINE

“E deadline pa un reaccion tabata pa duna e comunidad comercial di centro di ciudad e tempo pa planea pa e temporada di fin di aña, pero ningun reaccion a drenta te cu awor.” Mes momento Chemaly a clarifica, cu ningun momento no a pone un ultimatum, sino un deadline. “Tabata minister mes, cu a pidi un carta (di nos),” Chemaly a sigui bisa.

DESVIACION DI SUGERENCIA TA POSIBEL

NoticiaCla.com a puntra Chemaly, con hopi, e comision tabata dispuesto pa desvia di e cantidad di sugerencia cu nan a haci (lesa e sugerencianan aki den e articulo en cuestion). Segun Chemaly, nan sugerencianan tabata netamente esey. Sugerencia pa wordo discuti. “Semper ta posibel pa desvia di esaki. Nos ta djis buscando forma pa alivia e situacion den downtown,” Chemaly a sigui bisa.

IMPLEMENTACION LIHE?

Den cuadro di esaki, y mirando cu december a yega caba, Chemaly ta sigura cu nan ta realistico, y cu nan no a kere cu nan sugerencianan lo a wordo implementa mesora. “Ni si nos tabata kier esey.”

CANTIDAD DI COMERCIANTE PARTICIPANTE

Finalmente, mirando e discusion riba e cantidad di comerciante cu ta pro y contra, y cu ta papia cu un grupo grandi lo ta representa den e comision, a puntra Chemaly pa un clarificacion riba esaki. Segun Chemaly, "E grupo ta considerabel. Nos tabatin planea pa haya firma, pero tempo tabata esencial, pues nos a dicidi di manda e carta sin firma, pa awor. Nos lo sigui, pa haya e firmanan, y despues un formacion di un asociacion di comerciantenan di centro di ciudad (downtown association)."