Parlamentarionan Hulandes kier claridad riba visa pa Venezolano bin Aruba

DEN HAAG – E asunto di visa pa Venezolanonan drenta Aruba, a drenta Tweede Kamer na Hulanda awor, cu dos parlamentario Han Ten Broeke y Andre Bosman (ambos di partido VVD) a haci ministernan Bert Koenders (Minister Relacionan Exterior) y Plasterk (Reino Hulandes) riba e tema. Nan a manda un carta diabierna ultimo cu 5 pregunta riba e tema, pa haya mas claridad.

VISA POR TIN CONSECUENCIA POLITICO SERIO?

Manera custumber, e preguntanan ta cuminsa cu si e mandatarionan ta na altura di e fuente di e preguntanan, esta otro articulo cu a keda publica den e vespertino Amigoe di algun dia prome, titula “visa pa Venezolanonan tin consecuencia politico”. Un pregunta specifico, ta puntra ‘si ta berdad cu Minister di Turismo di Aruba, a bisa cu e entrada di Venezolano pa e isla, lo por wordo frena cu introduccion di un visa, pero cu un medida asina lo tin consecuencia politico serio’.

SI PLASTERK TA COMPARTI PENSAMENTO DI ODUBER

Un pregunta aun mas interesante, y cu por trece claridad riba e pensamento Hulandes, ta ora cu e dos parlamentarionan puntra e dos ministronan Hulandes, si nan ta comparti e pensamento di e Minister di Turismo di Aruba. Y si nan ta comparti e opinion cu e mandatario di Aruba, kico e consecuencianan negativo esey por tin pa e pais, of Reino Hulandes completo? Y cua indicacion tin pa cu esey?

REUNI CU ISLANAN RIBA E TEMA

A puntra e mandatarionan tambe, si a evalua e posibilidad pa introduccion di un visa pa Venezolano caba, durante un di e reunionnan entre Aruba, Hulanda y Corsou, y si no ta asina, si nan (esta e mandatarionan) ta dispuesto pa discuti esaki ainda cu e respectivo paisnan.

EFECTO WATERBED

E ultimo pregunta tambe tabata uno interesante, cu si un visa keda implementa pa Aruba y Corsou, cu si esaki por tin efecto negativo pa Bonaire, cu lo awor por converti su mes den un ruta pa droga, conoci como e asina yama ‘waterbed effect?’ Esey ta ora cu cera dos ruta exitoso pa traficacion di droga, ta uza un otro ruta, den e caso aki, Bonaire. Lesa e preguntanan original aki.