Bikker na Venezuela: Contra introduccion visa pa Venezolano

VALENCIA – Parlamentario Andin Bikker no ta apoya e idea pa tin visa pa Venezolanonan bishita Aruba. Durante un conferencia di prensa diabierna ultimo na Valencia, prensa Venezolano a consulta esaki cu ne. For di nos coleganan Venezolano di El Nacional, NoticiaCla.com a haya e raportahe y foto di e conferencia aki. Aki, e periodistanan a puntra e parlamentario di Aruba riba su pensamento. Segun Bikker, e ta un tema discuti den parlamento na Aruba, pero cu segun su pensamento, e no mester wordo aplica.

DILEMA CU TURISMO VENEZOLANO

“Aworaki na Aruba, nos tin un dilema pa e turismo cu ta biniendo di Venezuela, pa motibonan economico cu ta transporta nan pa Aruba, y ta evaluando e situacion,” e parlamentario a bisa e grupo di periodista Venezolano. “Pero mi ta bisa boso cu Venezuela, pa Aruba, ta e di dos mercado sostenedo di nos turismo, y nos ta evalua con nos por acomoda y no introduci e visa aki. E ta un discusion internacional cu Reino Hulandes, ” Bikker continua bisando. “Di parti di mi partido, nos ta expresa cu e pueblo Venezolano tin cu semper keda bon bini riba nos isla,” Bikker a finalisa bisando. Bikker ta na Valencia, pa forma parti internacional di control di e eleccionnan parlamentario, cu ta tuma lugar diadomingo na Venezuela. Fuera di Bikker, Glenbert Croes, parlamentario pa partido MEP, tambe ta na Venezuela como observador di e eleccion.

Fuente: Tibisay Romero. El Nacional