Bikker ta compaña ‘Mesa Unidad Democratico' na Venezuela

VALENCIA – Parlamentario Andin Bikker a confirma, cu e lo ta den e grupo di persona, cu ta controla e proceso electoral Venezolano awor, diadomingo den estado di Carabobo, pa ‘garantisa' e transparencia di e proceso democratico, den e pais, debi na e lazonan historico di amistad cu tin entre Venezuela y Caribe. For di coleganan di prensa, di El Nacional na Venezuela, NoticiaCla.com a haya e raportahe di e conferencia. Bikker, lo ta e unico acompañante internacional invita pa e mesa di unidad democratico na Carabobo.

ACOMPAÑANTE DI PROCESO DEMOCRATICO

“E pueblo Venezolano ta hopi keri pa e pueblo di Aruba. E ta orguyese mi, y mi tin un grato placer di ta un acompañante di e proceso democratico aki, y ta roga nos creador y ta implora e pueblo Venezolano, cu e proceso di 6 di december bay riba un bon caminda, y ta respeta transparencia, democracia, y derecho humano,” Bikker a bisa durante un conferencia di prensa na Venezuela diabierna.

CERCANIA ARUBA Y VENEZUELA

“Debi na e cercania di Aruba cu Venezuela, claro cu cualkier desaroyo geopolitico na Venezuela nos ta percibi, y ta sinti’e casi diariamente na Aruba. P'esey ta hopi importante y relevante pa nos na Aruba, cu e proceso democratico wordo respeta y cu tin democracia den e region, specialmente na Venezuela,” Bikker a bisa durante e conferencia na cede di e partido Proyecto Venezuela, na Valencia.

HENRIQUEZ FERNANDO SALAS

Hunto cu Andin Bikker, tabatin ex gobernador di Carabobo, Henriquez Fernando Salas, cu a bisa, cu e eleccionnan di 6 di december, no ta solamente importante pa Venezuela, sino pa henter e region latinoamericano, pasobra loke sosode na Venezuela, ta afecta Centro y Sur America. Fuera di Andin Bikker, parlamentario Glenbert Croes di partido MEP, tambe ta forma parti di e grupo di observadornan internacional. Pa Corsou, politico Melvin Daal y representante di partido MAN Giovanni Atalita, ta na Venezuela tambe como observador di e eleccion. Venezuela ta eligi nan parlamento diadomingo, conoci como e Asamblea Nacional, unda cu oposicion lo kier tin mayoria, y cu ta mustra te cu e siman aki, cu nan ta hiba e delantera. Presidente di e pais, Nicolas Maduro, na varios occasion a bisa caba, cu si nan no logra haya mayoria, nan lo subi caya y hiba e revolucion for di eynan.

Fuente: Tibisay Romero. El Nacional. 

.