De Meza: Dilanti dianan di fiesta (WEB) ta spanta hende di e forma aki

ORANJESTAD – Ta lamentabel cu esaki (carta di WEB pa cobransa atrasa) a sali ne momentonan aki. “Net dilanti porta di dianan di fiesta pa spanta hende di e forma aki”. Asina Minister di Utilidad Mike de Meza a bisa awe den parlamento, di e caso di siman pasa, ora cu e compania di utilidad WEB a manda 2.000 carta di recordatorio, pa paga sino ta corta meter di awa. E mandatario tabata den parlamento awe riba invitacion, pa duna cuenta riba e caso aki. Fraccion di MEP (partido di oposicion) ta esun cu a pidi e reunion e siman aki, y ya algun dia despues esaki a keda concedi.

SPLICACION DI CANTIDAD DI METER DI AWA Y CORIENTE

E mandatario ademas a splica e desaroyo y parti logistico di e asunto di clientela di tanto WEB como Elmar, relaciona cu recibo y meter di awa y coriente. Segun e mandatario, loke cu WEB a haci, "no ta corecto pasobra e tambe ta un parti di maneho di e companianan di utilidad, cu no ta corta meter di awa y coriente innecesariamente y riba un forma agresivo asina den luna di december”. Segun e mandatario, "lo mester ta hopi excepcional pa haci esaki”, de Meza a sigui bisa. Aki e ta referi tambe na e protocol firma na 2009, cual ta contene e detayes riba con pa anda cu cortamento di recibo di awa y coriente, en caso esaki ta core atrasa. E ta ensera entre otro cu ta duna cliente, cu nan awa ta corta, e posibilidad pa reconecta esaki y yega na un areglo. Aki tambe a palabra cu no ta corta meternan di awa y electricidad, sigur no den luna di december, cu ta e luna di fiesta. “Y hopi hende a haci uso di esaki y esey a keda vigente”, e mandatario a sigura tur den parlamento e tempo ey.

MONTANTE

E mandatario tambe a duna un splicacion di e cantidad di meter cu tin, y e montante di placa cu esaki ta ensera. Entre nan, a splica cu WEB tin por lo menos 9 mil persona cu constantemente no ta paga na tempo, cu ta traduci den un suma di entre 6 pa 8 miyon florin, di e total di 100 miyon, cu e compania ta ricibi na placa di recibo di awa. Como tal por bisa cu tin 8% di e clientela total cu ta ‘mal pagado’. For di e 8 miyon mas of menos, tin 2.5 miyon florin na meter, pero cu ta atrasa. Tin un otro suma di 2 miyon na meter cu sea ta di hende cu a muri, sin cu esaki a keda registra, hende cu a muda, of bandona nos isla sin nunca sera nan cuenta y lague ‘habri’. Pues ta placa cu no por wordo colecta mas. Di e 8 miyon florin ey, tin 5.4 miyon cu ta pertenece na clientenan domestico cu ta ‘mal pagado’, y e otro 2.4 ta di otronan, manera negoshi y of fundacionnan, pues no residentenan. Di e 9 mil hendenan, WEB ta manda entre 2 pa 2.500 mil carta tur luna pa hende paga sino tin consecuencia. Na tur, WEB tin 40 mil meter di residente y 5 mil di negoshi/fundacionnan.

SITUACION NA ELMAR

Serca ELMAR, tambe tin problema cu pagamento laat, aunke aki nan ta menos tolerante. “Awa ta mas necesario y como tal WEB tin mas tolerancia (3 luna cuenta habri, vs 1 luna di Elmar)". Den caso di Elmar, de Meza a splica cu ey 20% di cliente ta paga laat tur luna. Y 90% di e meternan di coriente, ta pertenece na residencia y 10% na negoshi of fundacion. Pero e interesante di esaki ta cu 50% di e entrada di ELMAR di coriente ta bin di e 90% di meter residencial, y e otro 50% ta bin di e 10% di negoshi/fundacion. Esey kier men cu negoshinan ta gasta obviamente mucho mas na coriente, cu e residencianan.