Conocido docente di turismo y psycologo Tony Green a bay sosega

ORANJESTAD - Diahuebs a drenta e tristo noticia cu conocido psycologo, autor, docente y presentador di programa Tony Green a fayece. E tabata malo algun tempo, y su salud tabata basta fragil ultimo tempo. Green, pa e generacion hotelero, ta conoci for di su tempo como director di e hotel school na Bushiri, unda cu el a ocupa e funcion di general director (1984-2004). Hopi ta esnan cu a haya les den e sector hotelero di dje. Despues e la tuma e reto di bin cu un di e prome talk shownan na television, completo cu publico, Perspectiva Dinamica. E intencion tabata pa bin cu un show, 'estilo Ophra Winfrey'. Su topiconan tabata semper diferente, y tur dialuna anochi, e anochi tabata di Tony Green. Tempo di eleccion, tambe e tabata adapta su programa pa tal, y ultimo eleccionan e tabatin un programa dedica na netamente e topico politiconan. Ultimo e la skibi buki tambe. Pa hopi tempo no tabata mire mas den publico, sino aki aya. El a duna hopi seminario den exterior, manera Surnam y Bahamas. Recientemente NoticiaCla.com a topa cu un Tony Green hopi fragil, pero si cu e mesun animo di semper, cordial y cu e sonrisa estilo colgate di semper. Critico, pero respetuoso, cu su voz hopi sutil, e tabata sa di cuestiona topiconan di un forma cortes pero fuerte. NoticiaCla.com ta manda palabra di condolencia na su famianan y cu Tony Green sosega na paz.