Eman na Hulanda: “Mi no sa kico Aruba a haci cu Hulanda”

DEN HAAG — Durante su discurso diahuebs den centro di prensa na Nieuwpoort na Den Haag, Hulanda, Prome Minister di Aruba Mike Eman a dirigi su mes directamente na cierto invitadonan den e sala. E mensahe tabata cla: ‘respeta y tin confiansa den e plannan pa mehora e desaroyo y bienestar di Aruba’. Asina periodista Otti Thomas ta raporta pa e vespertino Amigoe awe. NoticiaCla.com a compronde cu entre e ‘blanconan’ di su mensahe tabata pa Secretario General Richard van Zwol, di ministerio di Relacionnan Exterior y representantenan di Eerste y Tweede Kamer di Hulanda. Nan tambe a forma parti di e audiencia, banda di colega Minister di Aruba Benny Sevinger, Minister Plenipotenciario Alfonso Boekhoudt y miembro di Raad van State Mito Croes. Banda di esey tabatin representantenan di entre otro TNO, Gasuni y Rietveld Academie. E ultimonan a haya palabra di danki pa nan atencion y inversion na Aruba.

MENSAHE DIRIGI

Segun e raportahe di Thomas, e peticion pa confiansa y respet pa e escohencianan di gabinete Eman, tabata pues dirigi pa van Zwol. “Mi no sa kico Aruba a haci Hulanda”, Eman a bisa, refiriendo na e critica hulandes riba e situacion financiero di Aruba, cu aña pasa a resulta den un ‘instruccion’ (aanwijzing). “E precupacionnan riba e debe tabata mas cu na su lugar. E debe no tabata contenible. Pero mi ta lamenta cu e debe creciente ta wordo culpa como resultado di mal maneho”, e mandatario a bisa. Comparando e situacion cu paisnan manera Francia, Alemania y Italia, unda cu ey tambe e crisis economico a aumenta, e debe di e respectivo paisnan, Eman ta mustra cu Hulanda no a referi na nan si. “Esey a haci un poco dolor. E ‘nuancering’ ta falta den e storianan cu nos ta tende di Aruba”, e mandatario a sigui bisa.

DECISIONAN CONCIENTE TUMA

Eman a ripiti cu su gobierno a tuma decisionnan conciente, door di stimula e economia, door di bin cu inversion, mientras otro paisnan a scohe pa economisa. Pero segun Eman, economisa lo no a funciona na Aruba. “Na Hulanda tur hende ta compronde e dicho ‘corta nos capa, di acuerdo cu nos tela’. Hendenan ta entusiasma, na Aruba economiza, lo a empeora e situacion y crea pesimismo riba e isla”, Eman a sigui bisa.

NOTA: FUENTE di e articulo ta di Amigoe, su autor Otti Thomas. Foto ta cortesia di GBA.