Trudy Hassell ta gana caso contra minister Arthur Dowers

ORANJESTAD – Sra Trudy Hassell mester ta bek den su funcion como comisario di polis pa asuntonan general, respectivamente di polisnan uniforma. Esaki ta e sentencia cu huez a dicta diahuebs contra minister di husticia Arthur Dowers. Den combersacion cu abogado di Hassell, David Kock, awe mainta, e abogado a splica NoticiaCla.com cu esaki ta nifica cu pa 11 di december mas tarda, su cliente mester ta bek den su funcion. Y minister no por apela e sentencia aki tampoco.

E CASO

Tabata dia 30 di november ultimo cu Hassell a presenta den corte, unda cu el a demanda e mandatario di husticia, cu e unico fin pa haya su funcion ‘bieu’ bek di comisario di polis, encarga cu e.o. e mando diario di polisnan uniforma. Esaki pasobra e minister a nenga su dos peticionnan anterior e aña aki pa e funcion specifico menciona. Ora cu Dowers a rechasa su di dos peticion (prome peticion tabata na juli, e y di dos 21 di october 2015), el a dicidi di entama un caso dia 13 di november 2015 den un caso sumario, mirando e urgencia di e caso.

ARGUMENTACION

Hassell ta argumenta den e caso, cu despues cu el a ‘bedank’ pa e funcion di director di KIA (cual funcion e la tene di januari di 2015 te juli 2015), el a pidi e mandatario pa su funcion bieu bek. Ta despues di e di dos peticion, el a haya contesta (di e minister) cu e no por haya su funcion bieu bek, pero si un funcion na nivel di comisario, pero formando parti di staf di e alto comisario. “Pues un funcion tras di lessenaar. Y conociendo sra Hassell, esey no ta un funcion p’e”, Kock a bisa NoticiaCla.com. Como tal el a protesta y dicidi di hiba minister corte.

PETICION DI HASSELL

Su peticion den e caso tabata pa entrante mesora, e haya su funcion bek, pendiente un caso den bodem procedure (caso a fondo), cu por dura hopi tempo. Y mirando e tempo cu e ultimo por dura, a opta pa e caso sumario.

NOMBRACION NA KIA

Tabata na fin di 2014 Hassell a keda nombra como director di KIA pa un periodo inicial di 1 aña, despues di cual lo evalua e merito di su prestacion. Pero nunca no a ‘formalisa’ e decision di ministerraad pa cu e evaluacion ey y e ‘parti temporal of definitivo di funcion’ na KIA. Loke tambe tabata un punto interesante, ta cu huez a cuestiona e autoridad di e minister pa ‘ubica’ Hassell den un funcion specifico na KPA, y a mustra cu ta e Alto Comisario ta esun cu ta autorisa pa tuma tal decision, y no minister. Como tal, huez ta opina cu e decision cu e mandatario a tuma dia 21 di october 2015, no ta valido. Di otro banda, e anuncio di Alto Mando cu ta haci mencion cu Hassell ta integra bek den cuerpo cu e funcion nobo, (fecha dia 13 di november), si ta valido. Sinembargo, ‘e un ke otro’ por keda ‘mei mei (den laira) ’, pues pa discusion riba su validez e interpretacion. Y como tal riba e anuncio di cuerpo, haci pa e Alto Comisario, tambe Hassell por apela via un ‘bezwaarschrift’. Den bista di esaki, y conforme cu Hassell lo haci esey, huez a duna Hassell rason y dicta contra e anuncio ey pa awor.

MINISTER NO TABATA CONVINCENTE

Ora cu minister den corte a mustra cu ta Hassell mes a  ‘tuma retiro como comisario’ ora cu el a asumi y acepta e funcion di director di KIA na 2014, huez a opina cu e mandatario no tabata ‘convincente’ den su argumentacion, pues huez no ta wak e como un punto valido. Y e hecho cu ministerraad su decision di 23 di december 2014 nunca no a keda formalisa (esta, cu mester a crea un claridad riba futuro di e posicion na KIA), e la crea un incertidumbre si enberdad e funcion tabata uno definitivo vs temporal, y ta debilita e argumento aki tambe. Ademas, ningun otro motibo no por a wordo duna segun huez, pakico minister no tabata kier a duna Hassell su funcion bieu bek, no a keda presenta durante tratamento di e caso. Como tal, por saca e conclusion, segun huez, cu dificilmente e peticion di e mandatario pa rechasa Hassell den su funcion solicita por wanta den un caso di procedura a fondo (bodemprocedure).

HUES A HONRA PETICION DI HASSELL

Finalmente, poniendo Hassell den un funcion manera cu e minister a ‘dune’, ta den desventaha di Hassell pa loke ta su futuro carera, y tambe su animo di traha. Como tal, huez a dicta cu e ta honra e peticion di Hassell, y cu mas tarda un siman despues cu e sentencia aki wordo anuncia, Hassell mester tin su funcion bek di comisario di polis, encarga cu operacion diario di polis (uniforma). E decision aki ta keda vigente te ora cu un decision cay riba e keho entrega di Hassell contra e decision di minister di dia 21 di october 2015 y e anuncio di alto mando den cuerpo mes, di dia 13 di november 2015. NOTA: NoticiaCla.com a tuma contacto cu oficina di minister Arthur Dowers, pero ainda no a haya reaccion di e mandatario. (Por lesa e sentencia aki). Foto cortesia Bon Dia Aruba.