Lotto a paga e miyonario su premio di 1.325.000 miyon

ORANJESTAD - E feliz ganado di e suma grandi di 1.325.000 miyon florin a pasa cobra e premio su mes. Sra. Jindai Z. a laga Lotto sa cu e ta sumamente contento di a bira Aruba su siguiente miyonario den aña 2015, danki na Lotto, e Loteria di Aruba. E ticket ganado a wordo bendi na One And All Lottery na San Nicolas y e combinacion di e numbernan corecto ta 07-15-16-28 Mega Ball 11.

CUATER MIYONARIO

E aña aki Lotto a parti un total di 4 premio miyonario! E prome premio miyonario a wordo gana riba 9 di januari cu un suma sumamente grandi di 2.4 miyon cu Mini Mega y Mega Plus. Na april, Lotto 5 a conoce un ganado di 2 miyon florin. Riba 21 di augustus Lotto a parti otro suma miyonario di 1.4 miyon florin cu, un biaha mas, Mini Mega y su Mega Plus. Y awo, na fin di november, a parti otro premio mas di suma miyonario, 1.325.000 florin, y na un solo ganado, cu a hunga e wega tan gusta, Mini Mega y su Mega Plus.

MAS CHENS

Awe nochi bo tin otro chens pa gana un tremendo jackpot cu Mini Mega y Mega Plus, mirando cu Lotto ta celebra Sinterklaas na grandi y ta subi e jackpot di Mini Mega , cu ta actualmente na 250 mil, cu un suma di 150 mil florin EXTRA, subiendo asina e jackpot na 400.000 florin. Esey ta nifica cu diabierna awo Lotto ta regala bo un tremendo regalo pa celebra Sinterklaas! Naturalmente bo por opta pa agrega Mega Plus acerca, pa 2 florin so, y bo ta gana 100 mil florin mas, pues pa diabierna awo bo por gana e suma di mey miyon florin, si asina mes, 500.000 florin. Tira bo liña na awa pa awe, y tir'e trempan!

WEGANAN DI LOTTO

Lotto, e loteria di Aruba tin 8 diferente wega; Catochi, Big 4, Zodiac, Wega di Number Korsou di Lotto, Lotto Di Dia, Lotto 5, Mini Mega y weganan di Raspa y Gana. Cumprando Lotto bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.