KvK: Parkeermeter a baha benta entre 30 pa 50% di comerciantenan

Oranjestad – Recientemente durante un encuentro entre camara di comercio y gobierno, e comerciantenan a vocifera nan desapunto cu e proceso di renobacion di centro di ciudad, principalmente e introduccion di parkeermeters, cu na nan parecer a bay sin cu nan mes, cu ta e grupo cu a wordo afecta mas, tabatin un bos real den e proceso. Es mas, nan ta sinti cu e cambionan haci no ta cuadra cu e meta principal pa atrae cliente den centro di ciudad y cu a falta comunicacion pa cu e desaroyonan y plannan.

PESO FINANCIERO ADDICIONAL

Sinembargo e impacto di ful e proceso a crea un peso financiero adicional pa e comerciantenan ariba un situacion cu ya caba tabata dificil. E comerciantenan ta preocupa cu si no bin cambio inmediato den e situacion actual, caminda cu benta a y ta sigui baha drasticamente cu un promedio di entre 30 pa 50%, nan no ta mira con nan lo por sigui carga cu e peso aki. Esaki lo tin consecuencianan grave pa mayoria di e negoshinan, teniendo na cuenta cu algun negoshi ya caba mester a opta pa scrap cierto servicio cu nan ta brinda (manera desayuno y almuerzo), y/o hasta kizas lo haya nan mes obliga sea pa 'downsize' e negoshi, incluyendo den cantidad di empleado, o na ultimo pa cera nan porta.

MINISTER TIN COMPRENSION

Segun e gremio comercial, den e encuentro cu ministro Oduber, e mandatario a expresa di ta comprende e inkietud y preocupacion, y cu su persona ta habri pa dialogo pa hunto purba di mehora e situacion. No obstante, Oduber a enfatisa cu tur partido envolvi mester keda obhetivo, ya cu no tin estudio ni cifras disponibel pa determina e motibo(nan) exacto pa e caida den benta. Parkeermeters no ta popular, pero e tin cierto beneficio tambe y a crea mas espacio pa parkeo pa cliente y simultaneamente a alivia violacionnan den trafico (miho fluho y no mas parkeo riba acera, etc.). Ademas e presencia di e parkeerwachters ta yuda crea un sentido di siguridad y por yuda preveni y disminui vandalismo, ladronicia y incidentenan cu e adictonan ambulante.

IMAGEN NEGATIVO?

Di otro banda ainda tin cierto puntonan di atencion, por ehempel: (i) e imagen negativo di parkeermeters bao di comunidad, ya cu no ta obvio pakiko a introduci parkeermeters y ta opta masalmente pa no haci uso di e parkeermeters y consecuentemente no ta bay mas den centro di cuidad, ni sikiera si e comerciantenan ofrece pa debolbe e placa cu a paga pa parkeo, (ii) e confusion pa cu e uso di e parkeermeters y unda tin cu paga pa parkeo y unda no y (iii) cu den cierto zona e parkeermeters no ta bon visibel. Ta trahando pa mehora e situacion aki y ta e intencion pa pone mas borchi di indicacion.

ALTERNATIVANAN

E comerciantenan a trece diferente sugerencia dilanti pa alivia e situacion un tiki, entre otro pa introduci parkeo gratis riba diasabra o despues di 5or di atardi y/o parkeo gratis o tarifanan special pa cierto temporada (manera back to school, halloween, sinterklaas, fin di ana, etc.). Ministro a indica cu lo introduci un tarifa special di Awg 3,=, pa 4 ora, pa cierto temporada y cu lo por evalua e sugerencia di parkeo gratis. E mandatario a mustra si riba e hecho, cu e comerciantenan tambe mester compromete nan mes, pa bin cu alternativanan, teniendo na cuenta cu mundialmente e conducta pa haci compras ta cambiando y cu mas y mas cliente ta prefera di bay shop na un orario mas laat. Esaki ta pone cu na Aruba tambe mester trata di keda al dia cu e desaroyo aki, caminda cu lo por evalua pa organisa shopping nights regularmente o adapta e orario di cierre te cu por ehempel 9'or o 10'or di anochi.

PALABRACION

A keda palabra cu Ministro Oduber cu lo forma un comision cu representantenan di comercio pa sinta huntu cu representantenan di gobierno y Aruparking. E comision lo tin como tarea pa delibera riba algun propuesta pa mehora e situacion pa cu e centro di ciudad y lo ta encarga cu e proceso y periodo di ehecucion di locual cu wordo acorda. Algun di e comerciantenan presente a reuni y a forma un comision temporario y cu sosten di otro comerciantenan a dirigi un carta na Ministro Oduber cu algun pregunta y sugerencia pa stimula haci compras den centro di ciudad. KvK a toca e tema aki tambe den su reunion cu Prome Ministro, di 26 di november ultimo y a trece e preocupacion dilanti cu tin varios negoshi, cu tin dificultad pa tene cabes riba awa.

GOBIERNO DISPUESTO PA DIALOGO

Ministro Presidente na su turno a indica di ta dispuesto pa dialoga, pa huntu trata di yega na un solucion, pa mehora e situacion preocupante aki. Entre tanto, su persona a delibera cu Ministro Oduber riba e punto di parkeermeters y a yega na un acuerdo pa parkeo gratis proximamente riba 4, 5, 12, 19, 21 te cu 24 y 31 di december, cu sin duda lo contribui na alivia e situacion y cu pa e comerciantenan ta mas cu bonbini, principalmente den e periodo aki di fin di aña.