Bermudez: Otro siman lo presenta sticker pa comproba pago autobelasting

ORANJESTAD – Otro siman por cuminsa bende sticker enbes di number di auto nobo. Minister Angel Bermudez a confirma esaki awe mainta na NoticiaCla.com. Segun e mandatario, esaki mester a cuminsa e siman aki, pero problema tecnico a impedi esaki. “(Tabatin) 'delay' den printing!” e mandatario a bisa NoticiaCla.com. “Otro siman!”, ora cu a puntra ki tempo ta cuminsa e ora.

CONFERENCIA CU INFORMACION

Investigacion cu NoticiaCla.com a haci, ta indica cu pronto (otro siman posiblemente) departamento di belasting lo tene un conferencia di prensa pa anuncia esaki formalmente. E intencion ta pa introduci e sistema di sticker, cu ta indica cu un automobilista a paga su belasting di auto pa e respectivo aña. E intencion ta tambe pa pone e sticker aki riba windshield di e auto, pa asina e ta visibel ora di control. Mas detaye no tabata conoci, esta e grandura, color y unda exacto por cumpra esaki.

CAMBIO DI PROCESO

Manera ta conoci, tin cambionan na caminda pa cu e proceso di number di auto, y e parti di sticker ta parti di e proceso aki. NoticiaCla.com a informa caba cu no a ‘bestel’ numbernan nobo di auto pa 2016, mirando cu tabatin cambionan na caminda pa cu esaki. Awor cu e ley no ta cla y cu no tin claridad pa cu number di auto, no tin plachi pa 2016, y e sticker awor ta parse di ta e forma mas practico pa soluciona e problema aki.